తెలుగు సామెతలు - క , కా , కి , కీ , కు , కూ , కృ , కె , కై , కొ , కో మరియు ఖా

* కంకణాల చెయ్యి ఆడితే, కడియాల చెయ్యీ ఆడుతుంది.

* కంకి ఎఱ్ఱనయితే, కన్నెఱ్ఱనవుతుంది.

* కంచం అమ్మి మట్టెలు (మెట్టెలు) చేయించినట్లు.

* కంచం ఇచ్చి మెట్టె పెట్టించుకున్నా కానలేడు మొగుడు.

* కంచం చెంబు బయటపారవేసి రాయి రప్ప లోన వేసుకునంట్లు.

* కంచంత (కంచి+అంత) బలగమున్నా, కంచంలో కూడు వేసే దిక్కులేదు.

* కంచం పొత్తేగానీ, మంచంపొత్తు లేదు.

* కంచంలో కూడూ కుడువనే గానీ కాలదన్నను కాదు.

* కంచరి దానింటి పిల్లలు తాటాకు చప్పుళ్ళకి బెదరరు.

* కంచానికి ఒకడు, మంచానికి ఇద్దరు.

* కంచి అంత కాపురం గడ్డలైనట్లు.

* కంచి మేకకువలే కడుపెడు బిడ్డలు.

* కంచిలో దొంగిలించేదానికి, కాళహస్తి నుంచి వంగిపోయినట్లు.

* కంచు మట్టే, మంటిగాజు ఉంటే కావలిసినదేముంది?

* కంచు మ్రోగునట్లు కనకంబు మ్రోగునా?

* కంచువట్టల ఆడుది. (గయ్యాళి ఆడుది అనుట).

* కంచె మంచిదికాకపోతే కొయ్య కొల్లబోతుంది.

* కంచలేని చేను, కన్నతల్లి లేని బిడ్డవంటిది.

* కంచ వేసినదే కమతము.

* కంచే చేను మేస్తే, కాపేమి చేయగలడు?

* కంటికి ఇంపైతే, కడుపుకూ ఇంపు.

* కంటికి తగిలే పుల్లని కనిపెట్టుకు తిరగమన్నారు.

* కంటికి రెప్పా, కాలికి చెప్పు.

* కంటికి రెప్ప ఆసరా, పులికి మల (కొండ) ఆసర.

* కంటి రెప్పలుపోయాక, కాటుక, పూలు ఉంటే ఏమాయె?

* కంటివంటి ప్రకాశంలేదు, మంటివంటి ఆధారంలేదు.

* కంటే సుంకం, కానకుంటే బింకం.

* కండ్లు ఆర్చినమ్మ ఇండ్లు ఆర్చును.

* కండ్లు ఉంటేనే కాటుక.

* కండ్లు కావాలంటవి, కడుపు వద్దంటుంది.

* కండ్లు చెడిపిన దేవుడు మతిని ఇచ్చినట్లు.

* కండ్లు పెద్దవి, కడుపు చిన్నది.

* కండ్లు పోగొట్టిన దేవుడు ఇండ్లు చూపక మానడు.

* కండ్లు పోయినతరువాత సూర్యనమస్కారాలు.

* కండ్లు మూయించవచ్చును గానీ, కలలు కనేటట్లు చేయగలమా?

* కంతి (కణిత) బలుపు కాదు, చింత తిరిక గాదు.

* కంతి తలగడకాదు, కల నిజంకాదు.

* కందం చెప్పిన వాడు కవి, పందిని పొడిచినవాడు బంటు.

* కందకు లేదు, చేమకు లేదు, తోటకూరకు దురద ఎందుకు?

* కందకు లేని దురద కత్తిపీటకా?

* కందకు లేని దూల చేమకెందుకు?

* కందకు లేని నస బచ్చలికేల?

* కందిగింజను, కాపువానిని వేచనిదే చవిగావు.

* కందిచేల్లో కర్రు పోగొట్టుకొని, పప్పు పెట్టిలో వెతికినట్లు.

* కంది పండితే కఱవు తీరును.

* కందెన పెట్టనిదే పరమేశ్వరు బండియైనా పారదు.

* కందెన వేయని బండికి కావలసినంత సంగీతం.

* కంప తొడుగు ఈడ్చినట్టు.

* కంపలో పడ్డ ఈగవలె.

* కంపుచూడను పువ్వు నలుపవలెనా?

* కంపునోటికి అల్లం పచ్చడా?

* కంపునోటివాడు కూడబెడితే, మంచినోటివాడు మాయం చేసినట్లు.

* కంపు పెట్టుకొని, గంపెడు తిన్నట్లు.

* కంబళిలో తింటూ, వెంట్రుకలు ఏరినట్లు.

* కంబారీ పశువులుపోయినా, మారటతల్లికి బిడ్డలు పోయినా బాధలేదు.

* కంభం చెరువు చూసి, దున్నపోతు ఆ నీళ్ళన్నీ తానేదున్నాలనుకొని గుండెపగిలి చచ్చిందట.

* కంసాలివాని ఇంటికి వెళితే బంగారం అంతదుగానీ, కుమ్మరి వాని ఇంటికి వెళితే మాత్రం మట్టి అంటుకుంటుంది.

* కంసాలి కూడు కాకులు కూడా ముట్టవు.

* కంసాలి గోటు, కరణం తేటు.

* కంసాలి పెళ్ళికి ఇల్లంతా పొయ్యిలే.

* కంసాలి బఱ్ఱె నమ్ముతున్నాడు, లోపల లక్క లేకుండా చూడరా అన్నాడట.

* కంసాలి మాయ కంసాలికి గానీ తెలియదు.

* కంసాలి లేకుండా చూసి కధ చెప్పమన్నారు.

* కంసాలి వద్దనైనా ఉండాలి, కుంపటిలోనైనా ఉండాలి (తగ్గిన బంగారం).

* కంసాలి వారు కాలానికి పెళ్ళికొడుకులు, కరువుకు కాటిపీనుగలు.

* కక్కదింటే (కక్కేదాకా తింటే) గారెలు చేదంట.

* కక్కిన కుక్కవద్దకు, కన్న కుక్కవద్దకు కానివాణ్ణయినా పంపరాదు.

* కక్కిన కూటికి ఆశించినట్లు.

* కక్కిన బిడ్డ దక్కుతుంది.

* కక్కూర్తి మొగుడు కడుపునొప్పి బాధ ఎరుగడు.

* కక్కూర్తి పడ్డా కడుపు నిండాల.

* కక్కూర్తి పడ్డా సుఖం దక్కాలి.

* కచ్చితానికి కాసులు, ఉచితానికి ఊళ్ళు.

* కటకట ఉన్న ఇంట కలిమి ఉండదు.

* కటకటా అనే ఇంట కట్ట బట్టా, తిన తిండి ఉండవు.

* కటికవానికి కత్తి అందించినట్లు.

* కట్టకింద కఱ్ఱలాడితే, మాలదాని పిఱ్ఱ లాడుతాయి.

* కట్టనిలువని చెరువు గడియలోపలనిండు, బ్రతుకలేని బిడ్డ బారెడుండు.

* కట్టిన ఇంటికి వంకరలు (వణుకులు) చెప్పేవారు వెయ్యిమంది.

* కట్టిన ఇల్లు, పెట్టిన పొయ్యి.

* కట్టిన ఇంటికి కణుకులు మెండు.

* కట్టినవానికొక ఇల్లైతే, అద్దెకున్నవాని కన్నీ ఇండ్లే.

* కట్టిన వారు ఒకరైతే, కాపురం చేసేది ఇంకొకరు.

* కట్టివేసిన బఱ్ఱెకు కావలి కాచినట్లు.

* కట్టుకున్న ఆపే, పెట్టుకున్న ఆమే ఉండగా, ఎదురుపడ్డ ఆపె ఎండిపోయిందట.

* కట్టుకున్న పెండ్లామే చేయవలె, కన్న తల్లే చెయవలె.

* కట్టుకున్న మొగుడు, పెట్టెనున్న నగలు.

* కట్టుకున్న వాడికంటే, పెట్టుకున్న వాడిమీదనే ప్రేమ.

* కట్టుచీర లేనినాడు పట్టుచీర బయటకు వస్తుంది.

* కట్టులేని ఊరు, గట్టులేని చెరువు.

* కట్టె గొడ్డలిలో దూరి, కులానికి చేటు దెచ్చు.

* కట్టె దేవుని దగ్గర, కన్ను లంజ పైన.

* కట్టెలు ఆటని ఇంట్లో కనకము కూడా ఆటదు (ఆట= ఆగు, నిలుచు).

* కట్టెలు తేరా తిమ్మా అంటే, కడుపునొస్తదే అమ్మా అన్నట్లు.

* కట్టెలోన నగ్ని పుట్టిన విధమున.

* కట్టె వంక పొయ్యి తీరుస్తుంది.

* కట్టేయస్వాహా, కంపాయస్వాహా, నీకూ నాకూ చెరి సగాయస్వాహా.

* కట్టెలేదు, కంపలేదు, కాచీపోయా నీళ్ళూ లేవు, పదవోయి అల్లుడా బావి గట్టుకు.

* కట్టేవాడు అవివేకి, ఇంట్లో బాడిగకు ఉండేవాడు వివేకి.

* కట్టేవి కాషాయాలు దూరేవు దొమ్మరి గుడిశలు.

* కఠినచిత్తు మనసు కరిగింపగారాదు.

* కఠినమైనా కన్నతల్లి, వట్టిదైనా వరికూడు.

* కడగా ఉన్న గొడ్డలిని కాలిమీద వేసుకున్నట్లు.

* కడాగా పోయే శనేశ్వరుడా మా ఇంటిదాకా వచ్చి మరీ పొమ్మన్నట్టు.

* కడచి బ్రతికిన దెవ్వరు?

* కడచి బ్రతికినామని గంతులు వేయరాదు.

* కడచినదానికి వగచిన లాభమేమి?

* కడజాతికానీ, కాసులు కలవాడే రాజు.

* కడపటి మడివాని కటారిపోటు కంటే, ఎదుటి మడివాని ఏకుపోటు మేలు.

* కడలిలో ఉప్పుకు, అడవిలో ఉసిరికకు లోకువా?

* కడవంత గుమ్మడికాయైనా, కత్తిపీటకు లోకువే.

* కడవ వెళ్ళి కడముంతలో దూరినట్లు.

* కడివెడు పాలకు ఒక్క మజ్జిగ బొట్టు.

* కడ వేరు మిగిలినా గరిక చిగర్చక మానదు.

* కడి అంటే నోరు తెరచి, కళ్ళెమంటే మూసినట్లు.

* కడి గండం కాచును, వత్తి మిత్తి కాచును.

* కడిగిన మొగముంటే ఎందుకైనా మంచిది.

* కడియాలవారు వచ్చారు అంటే కడియాలు కావాలా అన్నడుట.

* కడుగు తాగినవాని కడుపేమి నిండురా? (కడుగు=కుడితి, బియ్యం కడిగిన నీరు).

* కడుగు త్రగిన కాకి కఱ్ఱని కూయదా?

* కడుపా కళ్లేపల్లి చెరువా?

* కడుపా కొల్లేరు మడుగా?

* కడుపా చెరువా?

* కడుపుకాలి ఏడుస్తుంటే, మనవర్తి ఏమిస్తావు అన్నదిట.

* కడుపుకు పెట్టిందే కన్నతల్లి.

* కడుపు కూటి కేడిస్తే, ఇంకొకత్తి కొప్పుపూల కేడ్చిందట.

* కడుపు చించుకుంటే పేగులు కాళ్ళమీద పడును.

* కడుపు చించుకున్నా గారడి విద్యే అన్నట్లు.

* కడుపు చేసినవాడే కాయము, పిప్పళ్ళు తెస్తాడు (కాయము=తినబెట్టే మందు).

* కడుపుతో ఉన్నమ్మ కనక మానదు, వండినమ్మ తినక మానదు.

* కడుపున పుట్టిన బిడ్ద- కొంగున కట్టిన రూక.

* కడుపు నిండితే కడవలు మోయు, లేకపోతే పగులవేయు.

* కడుపు నిండినవానికి గారెలు కనరు.

* కడుపు రాతిలోని కప్పకు కలుగదా?

* కడుపులో కాపాడినవాడు కాలాన కాపాడడా?

* కడుపులో తిప్పందే కక్కొస్తుందా?

* కడూపులో ఎట్లాఉంటే, కాపురమలా ఉంటుంది.

* కడుపులో చల్ల కదలకుండా.

* కడుపులో మంట కానరాని మంట.

* కడుపులో లేనిది కౌగిలించుకుంటే వస్తుందా?

* కడుపులో లేని ప్రేమ కావాలంటే వస్తుందా?

* కడుపు వస్తే కనే తీరవలెను.

* కడుపే కైలాసం, ఇల్లే వైకుంఠం.

* కతకు కాళ్ళు, ముంతకు చెవులు కల్పించినట్లు.

* కలతమారి మొగుడు కమ్మలు చేయిస్తే, అప్పులకూటి మొగుడు అమ్ముకతిన్నాడు.

* కత్తి తీసి కంపలో వేసి, ఏకుతీసి పొడుచుకుంటానన్నాడట.

* కత్తిపీటకు పళ్ళు పులుస్తాయా?

* కత్తిపోటు తప్పినా కలంపోటు తప్పదు.

* కత్తిమీద సాము కడతేరబోదయా.

* కత్తిమీద సాము కానివాడికైనా తగదు.

* కత్తిమీది సాము, కొత్తి మీది కూడు.

* కత్తి మెత్తన, అత్త మంచి లేదు.

* కత్తు కలిస్తే పొత్తు కలుస్తుంది.

* కత్తెరలో వాన కనకపు పంట. (కత్తెర= కృత్తిక కార్తె).

* కత్తేస్తావా? బత్తేస్తావా? అన్నట్లు.

* కథ అడ్డంగా తిరిగింది.

* కథ కంచికి, మనమింటికి.

* కథకు కాళ్ళు లేవు, ముంతకు చెవులు లేవు.

* కదళి మింగువాడు గరళంబు మ్రింగునా?

* కదిపితే కందిరీగల తెట్టు.

* కదిలిస్తే గచ్చపొద.

* కదుటిలో పడదు, దిండులోనూ పడదు.

* కదురు కవ్వము ఆడితే కఱవే లేదు.

* కనక తరుణు లాసలేని సంసారులు కలలోనైనా కలరా?

* కనపడినప్పుడల్లా దండాలు పెడతావెందుకు? అంటే చేతులు ఊరకే ఉండి ఏంచేస్తాయిలే అన్నడట.

* కని గుడ్డి, విని చెవుడు.

* కని పెంచినవాడు కాలుజారినట్లు.

* కనిపెంచిన నాడు కొడుకులు గానీ, కోడాళ్ళు వచ్చాక కొడుకులా?

* కనుక్కున్నానండోయ్ కంబట్లో వెంట్రుకలు అన్నట్లు.

* కనుమనాడు కాకినైనా కదలనీయరు.

* కనుమనాడు మినుము కొరకాల.

* కనుమల మీద మెయులొస్తే, కళ్ళముందర వాన.

* కనుమకు కాకర, భోగికి పొట్ల.

* కనుమనాడు కాకి కూడా మునుగుతుంది.

* కనుసైగకు రాని కాంతను బలిమిడి కరమిడ వశమగునా?

* కన్నతల్లికి కడుపు కాలితే, పిన్న తల్లికి పిఱ్ఱ కాలిందట.

* కన్నతల్లికైనా కనుమరుగుండాల.

* కన్నపుదొంగ వాడలేదని ముంత ఇంటివానిని వదలి పోవునా?

* కన్నామేగానీ, కడుపులోపెట్టుకొని ఉంటామా?

* కన్నెఱికానికి కాసులేని ఆయన కలకాలం కాపాడుతాడా?

* కన్నెనిచ్చిన వానిని, కన్నిచ్చినవానిని (దృష్టి, ఙ్ఞానము) కడవరకు మరువరాదు.

* కన్నీరు కిందికి కారుతుంది, పన్నీరు పైకి చిమ్ముతుంది.

* కన్ను ఉండా, కనుపాపను కొన్నట్లు.

* కన్ను ఎరుగకున్నా, కడుపు ఎరుగుతుంది.

* కన్ను ఎఱ్ఱబడ్డా, మిన్ను ఎఱ్ఱబడ్డా కారక మానదు.

* కన్ను కైకలూరులో, కాపురం డోకిపఱ్ఱులో.

* కన్ను గుడ్డిదైతే కడుపు గుడ్డిదా?

* కన్ను గుడ్డిదైనా నిద్రకేంలోటు?

* కన్నుచూసి కాటుక, పిఱ్ఱచూసి పీట.

* కన్ను చూసినదాన్ని నమ్మితే, చెవి విన్నదాన్ని నమ్ముతుంది.

* కన్ను పోయేటంత కాటుక పెట్టుకుంటారా?

* కన్ను మనదే, వేలూ మనదే అని పొడుచుకుంటామా?

* కన్నులు కంచాలమీద నోరు రామరామ

* కన్నులు పెద్దవైతే కనుపాపలు పెద్దవవుతాయా?

* కన్నేలపోయెనోయి కనకలింగమా? అంటే, చేసుకున్న కర్మమోయి శంభులింగమా అన్నట్లు.

* కన్నులెంత పెద్దవైనా కలిమే, చన్నులెంత పెద్దవైనా జవ్వనమే.

* కన్ను వంటి ప్రకాశం లేదు, మన్నువంటి ఆధారం లేదు.

* కన్నెరుగకున్న కడుపెరుగు.

* కన్నొకటిలేదుగానీ (కా)కంతుడు కాడా?

* కన్నొకటిలేదు గానీ కవాటంలాంటి బిడ్డ.

* కన్యలో (కన్యామాసం=ఆశ్వయిజం) చల్లితే ఊదుకొని తినటానికి ఉండవు.

* కన్యలో చల్లితే కనుగంతులకైనా చాలవు.

* కపటము బయట దేవుడు, ఇంత దెయ్యము.

* కప్ప కాతులేదు, బాపన పోటులేదు.

* కప్ప కూతలు కూయు కాలభుజంగము.

* కప్పలు అరుస్తూనే ఉంటవు, దరులేమో (గట్లు) పడుతూనే ఉంతవి.

* కప్పలు ఎఱుగునా కడలిలోతు.

* కప్పలు కూస్తే వర్షం కురిసినట్లు.

* కప్పి పెట్టేస్తే కంపు కొట్టకుండా ఉంటుందా?

* కప్పుర మిచ్చి ఉప్పు కొన్నట్లు.

* కమలాసనుని కలహంసకు తూటికాడలే తిండి.

* కమ్మ అండగాదు, తుమ్మ నీడకాదు.

* కమ్మకు వరుసలేదు, కప్పకు తోకలేదు.

* కమ్మ (కాపు) గుట్టు కడప దాటదు.

* కమ్మని రోగాలు, తియ్యని మందులు.

* కమ్మ నీచు కడిగినాపోదు, కాకిచిప్ప పెట్టి గోకినా పోదు.

* కమ్మత్యాగంబు భువిలోన నమ్మకమ్మ.

* కమ్మనీ, తుమ్మనీ నమ్మరాదు.

* కమ్మరి వీధిలో సూదులమ్మినట్లు.

* కమ్మించి (ప్రోత్సాహించి) కడగా తొలిగేవాడు.

* కమ్ముల దుప్పటికి కొమ్ముల బఱ్ఱె.

* కయ్యానికైనా, వియ్యానికైనా, నెయ్యానికైనా సమత ఉండాలి.

* కరక, తురక రెండూ భేదికారులే; ఒకటి లోపలికి పోవాలి; ఇంకొకటి దగ్గఱకు వస్తే చాలు.

* కరక్కాయ కన్నతల్లి.

* కరచీ కాటుబడనట్లు.

* కరడి కాటు పడినవాడు కంబళి చూచినా భయపడును.

* కరణం, కంసాలి కపటం మరువరు (విడువరు).

* కరణం కాపు నా పక్కనుంటే, కొట్టరా మొగుడా, ఎట్లా కొడ్తావో-అన్నదట.

* కరణం గంటమెత్తితే కంఠానికి రావాలిగానీ, లేకుంటే శంఠానికి రాదు.

* కరణంతో కంటు, కాటికి పోయినా తప్పదు.

* కరణంతో కంటు పడితే, కాడి కదలదు.

* కరణం సాధుకాదు, కాకి తెలుపు కాదు.

* కరణము గ్రామ దండుగ గోరు, జంబూకంబే వేళ శవము గోరు.

* కరణముల ననుసరింపక విరసంబున తిన్నతిండి వికటించును.

* కరణానికి కాపుకే జత, ఉలికి గూటానికే జత.

* కరణానికి తిట్టుదోషం లేదు, చాకలికి ముట్టుదోషం లేదు.

* కరణాన్నీ, కంసాలిని కాటికి పోయినా నమ్మరాదు.

* కరణాలు కాపులు ఏకమయితే కాకులు కూడా ఎగురవు.

* కరవగ వచ్చునే బలిమి గాడిదకున్ పులితోలు కప్పినన్.

* కరవమంటే పామైనా కరవదు.

* కరవమంటే కప్పకు కోపం, విడవమంటే పాముకు కోపం.

* కరికి ప్రాణము తొండము, సిరికి ప్రాణాము మగువ.

* కరి గుట్టులో కాలుపెట్టదు, అంబటిలో వేలు పెట్టదు.

* కరిని గాంచిన కుక్క మొరిగిన సామ్యమౌ.

* కరువు కాలంలో ఒల్లని మొగుడు, పంతకాలంలో పంపమని వచ్చాడట.

* కరువుకు గ్రహణాలెక్కువ.

* కరువుకు చింతలు, కాలానికి మామిళ్ళు.

* కరువుకు తోడు ఆవపంట కలిగినట్లు.

* కరువుకు దాసరులైతే, పదాలెక్కడ వస్తాయి?

* కరువుకు మామిళ్ళు, కాలానికి నేరేళ్ళు.

* కరువునాటి కష్టలుండవు కానీ, కష్టాలనాటి మాటలుంటాయి.

* కరువులో అధిక మాసం.

* కరువులో అరువు.

* కరువులో బిడ్డను అమ్ముకొన్నట్లు.

* కరువు వస్తుందని సద్ది కట్టిపెట్టినట్లు.

* కర్మకంతం లేదు, కాలానికి నిశ్చయం లేదు.

* కర్మ చండాలుని కంటే, జాతి చండాలుడు మేలు.

* కర్మంగాలి మొగుణ్ణి కంబట్లో కట్టి, భుజం మీద వేసుకుంటే, జారి వీధిలో పడ్డట్టు.

* కర్కాటకం బిందిస్తే కాటకం ఉండదు (కర్కాటక మాసం=శ్రావణం).

* కర్కాటకం వర్షిస్తే, కాడిమోకు కూడా తడవదు.

* కర్ణుడులేని భారతం, శొంఠిలేని కషాయం ఒక్కటే.

* కర్ణుని తల భారత మన్నట్లు.

* కర్ణునితో ఉందమ్మా భారతయుద్దం అంతా అన్నట్లు.

* కర్ణునితో భారతం సరి, కార్తీక మాసంతో వానలు సరి.

* కఱకుల కళ్ళెం కల్యాణికి కాక గాడిదకేల? (కల్యణి=పంచ కల్యణి, గుఱ్ఱం).

* కఱిచే కుక్కకు కఱ్ఱ అడ్డం.

* కఱిచేది చెఱుకు, పట్టేది అనుము.

* కఱ్ఱకు పెట్టినా, గొఱ్ఱెకు పెట్టినా చెడదు.

* కఱ్ఱ చేతలేనివాణ్ణి గొఱ్ఱెకూడా కఱుస్తుంది.

* కఱ్ఱ విరగకుండా, పామూ చావకుండా కొట్టు.

* కఱ్ఱికుక్క కపిలగోవు అవుతుందా?

* కఱ్ఱు అరిగితేగాని, గరిసె విఱగదు.

* కఱ్ఱు అరిగితేనే కాపు బ్రతుకు.

* కఱ్ఱుగొట్టిన గంపెడు సూదులు.

* కలక వేసిన చేప వలకు రాకుండాపోతుందా? (కలక వేయు=నీటిపై ఎగిరిపడు).

* కలకాలం బ్రతికినా కాటికి పోక తప్పదు.

* కలకాలం బ్రతికే బ్రతుకులు, కుడికాలు పెట్టవే కూతురా అన్నట్లు.

* కలకాలపు దొంగ ఒకనాడు దొరకును.

* కలగక ఆడుమాట లయకాలునినైనా శమింపచేయును.

* కలగన్న చోటికి గంపనెత్తినట్లు.

* కలబంద ఎండు, కోడలి కొత్త లేదు.

* కలలో మూత్రం తాగినట్లు వస్తే, ఎవరితో చెప్పుకోను?

* కలలో కనిపించిన లంకెబిందెలు రాకపోయినా, పెరికి పెరికి పరువంతా నీళ్ళచాయ మాత్రం అయ్యింది. (నీళ్ళచాయ=చేబొంట్లకు, దొడ్డికి).

* కలలో కాంత నీటిలో నీడతో సమానం.

* కలలో జరిగింది ఇలలో జరుగదు.

* కలలోని కౌగిలికి కడుపులొస్తాయా?

* కలలో భోగం కలతోనే సరి.

* కలవారింటి ఆడపడుచుకు కాకరకాయ కానరాదు.

* కలిగింది తినేసి, కట్టుకున్నది విప్పేసి వెళ్ళమన్నట్లు.

* కలిగి ఉంటేనే కామితఫలములు కలిగేది.

* కలిగి ఉన్నవాడు రాజ్యాన్ని సున్నానికి తీసుకుంట అన్నట్లు.

* కలిగి తిననేర నివ్వదు గంపకమ్మ.

* కలిగితే కాళ్ళు ముయ్యా, లేకపోతే మోకాళ్ళు ముయ్యా.

* కలిగినది చెపితే కంట్లో పుల్ల పెట్టినట్లు.

* కలిగినమ్మ గాదె తీసేప్పటికి లేనివాని ప్రాణంపోయింది.

* కలిగినమ్మ గాడిదతో పోతే అదొక వ్రతం, లేనమ్మ మొగుడితో పోతే మోహం (గుల).

* కలిగినమ్మ ఱంకు, కాషాయ బొంకు.

* కలిగిన మాత్రం తిని, కరణం గారి కమతం చేయమన్నట్లు.

* కలిగినయ్య కలిగినవాడికే పెడతాడు, లేనయ్యా కలిగిన వారికే పెడతాడు.

* కలిగినవానికి అందఱూ చుట్టాలే.

* కలిగిన వారింట కడగొట్టు కోడలయే కంటే, పేదవారింట పెద్దకోడలయ్యేది మేలు.

* కలిగిన వారి కోడలు కులుకు మానదు.

* కలిగెరా కయ్యం, దింపరా గంప.

* కలిపి కొట్టరా కావేటిరంగ (కస్తూరిరంగ).

* కలిపోసి పెట్టినా ఉట్టివంకే చూపు.

* కలిమి ఉన్నంతసేపు బలగం, కండ ఉన్నంతసేపు మిండడు.

* కలిమికి పొంగరాదు, లేమికి కుంగరాదు.

* కలిమి లేకుంటే కులం గవ్వ చేయదు.

* కలిమి లేములు, కావడి కుండలు.

* కలిమి వచ్చిన తలుపు మూసినట్లు.

* కలిసివచ్చే కాలానికి నట్టింటికే కుందేలు వస్తుంది.

* కలిసివచ్చే కాలానికి కుందేలు వంటింటికి వస్తుంది.

* కలిసివచ్చే కాలానికి నడిచివచ్చే పిల్లలు (పుడతారు).

* కలుపుతీతకు తిల్లిక కావలేనా? (తిల్లిక=దీపం).

* కలిపు తీయని మడి, దేవుడులేని గుడి.

* కలుపు తీయువాడు కోత కోయడు.

* కలుపు తీయువానికి కసవే మిగులుతుంది.

* కలుపు తీసేవాడు కండ్లకు రానీ, కోతకోసేవాడు గోటికి రానీ, అంతలో మా అమ్మ అంపమని రానీ! (ఆడపడుచు కోరిక).

* కల్పతరువు క్రింద గచ్చ చెట్లున్నట్లు.

* కల్పవృక్షం క్రింద గచ్చపొదలున్నట్లు.

* కల్పవృక్షం దగ్గరకువెళ్ళి, కాయలడిగినట్లు.

* కల్పవృక్ష్ మెంచి, కలివి చెట్లెంచుట.

* కల్యాణం వచ్చినా కక్కొచ్చినా ఆగవు.

* కల్యాణానికి ఒకడువస్తే, కన్నం వెసేదానికి ఇంకొకరు వస్తారు.

* కల్లం దగ్గర కరణీకం, కంచందగ్గర రెడ్డిరికం.

* కల్లాకపటం లేనివారికి కష్టలు తప్పవు.

* కల్ల పసిడికి కాంతి మెండు.

* కల్ల పడికి కఱకులు మెండు.

* కల్లమున్న చోటికే కంకి పోవును.

* కల్లరి నాలిక కోడెత్రాచు కోర వంటిది.

* కల్లలాడి కడుపు పల్లము నింపుకొన నేల?

* కల్లుకుండ కాడిదే కయ్యం, జుట్టు ఊడిపోయేదే దెయ్యం.

* కల్లు లొట్టెడి త్రాగి కైపెక్కి వదరిన శాస్త్రవాది కాడు.

* కల్లరికి మంచి ఙ్ఞాపక శక్తి అవసరం.

* కల్తీ విత్తనం వెల్తీ గాదెలు.

* కళాసు బ్రతుకు గాలివానతో సరి.

* కళ్ళం (కల్లం) పళ్ళెం పెద్దవిగా ఉండాలి.

* కళ్ళం వెళ్ళిన తరువాత కంది గుగ్గిళ్ళు.

* కళ్ళుకానని పెళ్ళికూతురు, కమతగాని వెంటపోయిందట.

* కళ్ళు కావాలంటాయి, కడుపు వద్దంటుంది.

* కళ్ళు రెండున్నా కనిపించే వస్తువొక్కటే.

* కళ్ళూ కలిగినప్పుడే చళ్ళువస్తే, మదపుటేనుగును మంచానికి కట్టేద్దును, నీదాకా రానిద్దునా అన్నదట.

* కవికి కంసాలికి సీసం తేలిక.

* కవితకు మెప్పు, కాంతకు కొప్పు.

* కవి యను నామంబు నీరుకాకికి లేదా?

* కవిత నేర్పు యతి కూర్పే తెలుపుతుంది.

* కవిత్వం గడ్డి అనుకొని గాడిదలన్నీ పడి మేయసాగినవట.

* కవిలి (కలే) చెట్లు కాస్తే, కారు (రెండవ పైరు) వరి పండుతుంది.

* కవిలి (కలే) చెట్లు పండితే కఱ(రు)వు తప్పదు.

* కవ్వం కదురు తిరిగిన ఇంట కరువు లేదు.

* కష్టపడి ఇల్లు కట్టి, కల్లుతాగి తగులబెట్టినట్లు.

* కష్టపడి సుఖపడమన్నారు.

* కష్టసంపాదనము, ఇష్టభోజనము.

* కష్టాలు కలకాలం కాపురముండవు.

* కష్టలు నిన్ను కష్టపెట్టేవరకు నీవుగా వాటిని కలయబెట్టకు.

* కష్టలు మానవులకు కాక మానులకా?

* కసవులేనుదే పశువులేదు, పశువులేనిదే పెంటలేదు, పెంటలేనిదే వంట లేదు.

* కరువులో పనసకాయ తరిగినట్లు.

* కసిపోనమ్మ మసిపూసుకున్నదట.

* కసాయివాడికి కత్తి అందించినట్లు.

* కసువుకు పోరా కమ్మా అంటే, కడుపునొప్పే నా అమ్మా; బొచ్చె ఎత్తుకరా బొమ్మ అంటే అట్లా చెప్పవే నా యత్తా అన్నాడుట.

* కస్తూరీ నలుపే, తెలకపిండీ నలుపే.

**********:: కా ::**********

* కాంచనం కర్మ విమోచనం.

* కాంతల భ్రమలు కనుగట్టు మాయలు.

* కాంతా కనకం కాశ్యపులే కయ్యాలకు మూలం. (కాశ్యపి=భూమి)

* కాకరకాయకు కంతలు (గంట్లు) ఎన్ని? అంటే, ములగ కాయకు ముండ్లెన్నీ? అన్నాడట.

* కాకరబీకర కాకు జాతారే? అంటే దూబగుంటకు దూదేకను జాతారే అన్నాడట ఇంకో దూదేకుల సాహేబు. (ఉరుదు వచ్చిరాని దూదేకులవారి సంభాషణ).

* కాకి కఱ్ఱుమన్న కడుపాయె వదినా; కత్తవ బావికి పోతే కరిగిపోయె వదినా! (కత్తవ = ఏటికి కట్టిన అడ్డకొమ్మ (కట్ట)).

* కాకి కఱ్ఱుమంటే, మొగుణ్ణి అప్పా అనెనట.

* కాకి కావుమంటే, మొగుణ్ణి కౌగిలించుకొన్నట్లు.

* కాకికి కంకెడులేదు, పిట్టకు పిడికెడులేదు.

* కాకికూత బోలు కర్మ బంధుల కూత.

* కాకి కూయగాలేచి, కాటుకమాదిరి అన్నం కాకరకాయ మిరియం చేసి, పసువులొచ్చే వేళకు పరుగెత్తి పరుగెత్తి వడ్డించిందట.

* కాకి గూటిలో కోకిలపిల్ల వలె.

* కాకి గూడు పెడితే కడపటి వర్షం.

* కాకి చిక్కిన గొడ్డు డొక్కచీల్చునుగానీ, బలిసిన వసరం పొంత పోగలదా?

* కాకిని కొడితే గద్ద చచ్చిందట.

* కాకినితెచ్చి పంజరంలో పెడితే చిలుకపలుకు పలుకుతుందా?

* కాకిపిల్ల కాకికి ముద్దు.

* కాకిముక్కున దొండపండు వలె.

* కాకి ముక్కెర తన్నుకొనిపోయి డొంకలపాల్చేయుగానీ తినగలదా?

* కాకి సోమాల కుతురు-అంకమ్మకళల అల్లుడు (కాకిసోమాలు=వెఱ్ఱిచేష్టలు; అంకమ్మకళలు=అవ్యక్త చేష్టలు).

* కాకులు అరుస్తూనే ఉంటవి, కరవాడ ఎండుతూనే ఉంటుంది. (కరవాడ=ఉప్పు పట్టించి ఎండపెట్టిన ఉప్పునీటి చేప).

* కాకులను కొట్టి గద్దలకు వేసినట్లు.

* కాకుల మధ్య కోకిల.

* కాకులు రోకళ్ళెత్తుకు పోయినవి అన్నట్లు.

* కాకై కలకాలం ఉండేకంటే, హంసై ఆరునెలలున్నా చాలు.

* కాగల కార్యం గంధర్వులే తిరుస్తారు.

* కాచిన చెట్టుకు కఱకు రాళ్ళు.

* కాచినచెట్టుకే కఱ్ఱదెబ్బలు.

* కాచినగంజి తాగనిస్తే నేను కమ్మనాయుడనే (కాపు) నే కాదు అన్నాడట.

* కాటికి కాళ్ళుజాచి, తిండికి చేతులు జాచినట్లు.

* కాటికి పోయినా కరణాన్ని నమ్మరాదు.

* కాటిపోయినా కాసు తప్పదు.

* కాటికి పోయిన పీనుగు, కట్టెలపాల్గాక ఇంటికి వస్తుందా?

* కాటి దగ్గఱి మాటలు కూటిదగ్గర ఉండవు.

* కాతిలో పండినవి, కాకులు తిన్నవి-ఒకటి.

* కాడికిందకి వచ్చిన గొడ్డు, చేతికిందకు వచ్చిన బిడ్డ.

* కాడిన పోట్లలో కత్తితో గీకినట్లు. (కాడిన=గుచ్చుకొనిన, తెగిన)

* కాడు కాలుతూ ఉంటే, కన్నె ఎదుగుతూ ఉంటుంది.

* కాదు అంటే కళ తక్కువ, అవును అంటే ఆయుస్సెక్కువ.

* కాదు అన్నవాడే కరణం.

* కాదు కాదు అంటే, నాది నాది అన్నడట.

* కాదనకుండా కట్టెనిచ్చెను గానీ వినబడకుండ వీరణాలు వాయించగలవా?

* కానకుండ మాట్లాడే మాటా, కడగని గుద్ద ఒకటే.

* కానని ముఖానికి గంధము అక్షతలు.

* కానవచ్చే కొండలను గట్టెక్కి చూడటం ఎందుకు?

* కాని కాలాన ఆలే పెండ్లం (వ్యంగ్యం).

* కాని కాలానికి కంది అయినా కాయదు.

* కాని కాలానికి కఱ్ఱే పామై కాటేస్తుంది.

* కానికాలానికి పైబట్టను పక్షులెత్తుకు పోతాయి.

* కానీకి టెంకాయ ఇస్తారని కాశీకి పోయినట్లు.

* కానిచోట కందైనా కాయదు.

* కాని దానికి కంతలు మెండు.

* కానిపనులు సేయ ఘనులాస పడుదురా?

* కానిదానికి కష్టం మెండు, చెల్లని కాసుకు గీతలు మెండు.

* కానివాడు లేనివానితో జత.

* కానివేళకు కందులే గుగ్గిళయినట్లు. (వ్యంగ్యం).

* కానుగ నీడ-కన్నతల్లి నీడ

* కానున్నది కాకమానదు, రానున్నది రాకమానదు.

* కానుపుతో కూడా తల్లి చేసినట్లు.

* కాపుకు నెనరు (విశ్వాసం) లేదు, కందికి చమురు లేదు.

* కాపు చేసిన పాపం కళ్ళంతో తీరుతుంది.

* కాపు జాడ, గొఱ్ఱె జాడ.

* కాపుతోనే కఱువూ వచ్చింది.

* కాపు మంత్రులలో కటేరిదైవము. (కటేరి=క్షుద్రదేవత).

* కాపురం ఎట్లచేసావే కమ్మతిమ్మక్కా? అంటే, నువ్వు చెప్పినట్లు చేస్తినే బొచ్చుతిమ్మక్క అందట.

* కాపురం గుట్టు, రోగం రట్టు.

* కాపురం చేసే కళ, కాలుతొక్కేటప్పుడే కనపడుతుంది.

* కాపరానికి కడగండ్లు, మొగనికి రేజీకట్లు.

* కాపుల కష్టం భూపుల సంపద.

* కాపుల చదువులు కాసులు నష్టం, బాపల సేద్యం భత్యం నష్టం.

* కాపుల జాతకాలు కరణాలకెరుక.

* కాపువాడి పస కావడి పంటే చెపుతుంది (పంటి=మట్టికుండ).

* కాపువాళ్ళింట్లో పందిటి గుంజలుకూడా పనిబెట్టుతారు.

* కామము కాలమెరుగదు.

* కామమ్మ మొగుడంటె కామోసు అనుకున్నాను, కాకుంటే కావడి కుండలు పడేయండి.

* కామరాజు గాదెలు, భీమరాజు పాదులు.

* కామాతురాణాం న భయం న లజ్జా.

* కామాతురుడు అర్ధకాంక్ష వీడడు.

* కామానికి కళ్ళు లేవు, గుడీసేటికి గుణం లేదు (గుడిసేటి=లంజ, దేవదాసి).

* కామిగాక మోక్షకామి గాడు.

* కామినీ వేషధారికి సాధ్వి నడతలేమి తెలియును?

* కామిరెడ్డి అనే భూతానికి, రామిరెడ్డి అనే రక్షరేఖ.

* కామెర్ల రోగికి కనబడేదంతా పచ్చనే.

* కాయ కొడవలి నీ చేతికిచ్చినా, నీ ఇష్టంవచ్చినట్లు చేసుకో.

* కాయతిన్నా కంపే, గడ్డి తిన్నా కంపే.

* కాయని కడుపు-కాయని చెట్టు.

* కాయలో పత్తి కాయలో ఉండగానే-కామన్న కారు మూళ్ళు, నాకు మూడు మూళ్ళు (గుడ్డ).

* కారణం లేక కార్యం పుట్టదు.

* కారణం లేని కార్యం, పూరణం లేని బూరి, వీరణం లేని పెండ్లి ఉండవు (వీరణం=వాద్యవిశేషం).

* కారణ గుణమ్ము కలుగదా కార్యమునకు?

* కారములేని కూర, ఉపకారము లేని మనుష్యుడు.

* కారాకు వలే కర్మం కాలిపోతుంది. (కారాకు=పండుటాకు).

* కారాని కాలానికి రారాని పాట్లు.

* కారాని కాలానికి కప్ప దెయ్యమవుతుంది.

* కార్చిచ్చుకు గాడ్పు తోడయినట్లు.

* కారుజొన్న మేసే కోడెకు కైలాసం కావాలా?

* కారువరికి గొఱ్ఱెలమంద, పిషాణాలకు రొట్ట ఎరువు.

* కార్యం అయ్యేదాకా గాడిద కాళ్ళైనా పట్టాలి.

* కార్యం నాడు తలవంచుకొని, కలకాలం తలెత్తుకొని తిరుగ వచ్చు.

* కార్తీకం కలకాశ, వైశాఖం పులకాశ.

* కార్తీకం రానీ, కమ్మలు కడియాలు చేయిస్తానన్నాడట వైద్యుడు.

* కార్తీకంలో కలవారి అమ్మాయి, కడవనీళ్ళు తెచ్చే పొద్దుకూడా ఉండదు.

* కార్తీక పున్నానికి కలకపంతలు.

* కార్తీక మాసానికి కాకులు తొక్కుతాయి.

* కార్తీక మాసాన్న కడవలు కడుగ పొద్దుండదు.

* కార్తీక మాసానికి కుదురంత ఉందునా, మాఘమాసానికి నా మహిమ చూపిస్తాను.

* కార్తె ముందు ఉరిమినా, కార్యం ముందు వదిరినా (వదరినా) చెడుతుంది.

* కార్తెమూల మెరుపు కార్తెకు బలం (కార్తెమూల= ఈశాన్యము, కృత్తిక నక్షత్రపు దిక్కు).

* కార్తెమూల మబ్బు కారక మానదు.

* కాలంతో కరవులేదు, మగనితో దరిద్రంలేదు.

* కాలం కర్మం కలిసి రాకుంటే, కమలబాంధవునికైనా కష్టలు తప్పవు.

* కాలం కానప్పుడు, ఆలే తేలై కరుస్తుంది.

* కాలం గడచిపోవును, మాట నిలిచిపోవును.

* కాలం తప్పినవాడిని పై (మీద) బట్టే పామై కరుస్తుంది.

* కాలం తీరిందంటే, పమిటచెంగే పామై కరుస్తుంది.

* కాలం నాటి కందిగింజ, పెద్దలనాటి పెసరగింజ.

* కాలం పోతుంది, మాట నిలుస్తుంది.

* కాలం మారి కంచు పెంకైనట్లు.

* కాలం మూడిన వ్యక్తికి కాశీకిపోయినా సేగితప్పదు.

* కాలంలో విత్తనాలు కలలోనైనా చల్లాలి.

* కాలం వస్తే, గాడిదకాళ్ళు తిన్నన.

* కాల కర్మగతుల కనిపెట్టవలెనయా.

* కాలక్షేపంలేకపోతే, కంచిమేకను కొనుక్కోమన్నారు.

* కాలతంతే పెరిగేది పుచ్చకాయ, కుళ్ళేది గుమ్మడీకాయ.

* కాలను పాతకొయ్య, తాగను పాతకల్లు, నమ్మను పాత స్నేహితుడు, చదవను పాత పుస్తకాలు శ్రేష్టములు.

* కాలమందు చేస్తే దేవతలకు ప్రీతి, అకాలమందు చేస్తే అసురులకు ప్రీతి; ఇద్దరివాతా మన్నుకొడతాను అన్నట్లు.

* కాలమా ? యాలమా? కడకు చూడె పెళ్ళామా?

* కాలమొక్కరీతి గడిపినవాడే గడచి బ్రతికినవాడు.

* కాలానికి కడగండ్లు, దేశానికి (ముప్పు) తిప్పలు.

* కాలికి చుట్టుకున్న పాము కఱవక మానదు.

* కాలికి దూరమైతే కంటికి దూరమా?

* కాలికి వేస్తే మెడకు, మెడకు వేస్తే కాలికి.

* కాలికి బలపం కట్టుకొని కడప ముగ్గులు పెడతాడు.

* కాలికి రాని చెప్పును కంచెలో వేయమన్నారు.

* కాలికి రాని చెప్పు కడగా ఉంచు.

* కాలికోసం చెప్పులు ఒళ్ళో పెట్టుకోవాలి?

* కాలినట్టి మ్రాకు కడురమ్యమై ఉండును.

* కాలితో కదుపుకోవటం, చేతితో జుఱ్ఱుకోవడం.

* కాలితో నడిస్తే కాశీకి పోవచ్చునుగానీ, తలతో నడిస్తే తనవాకిలి దాటవచ్చునా?

* కాలిది తీసి నెత్తికి రాసుకున్నట్లు.

* కాలిన గుడిసెకు పీకిన వాసమే లాభం.

* కాలిన మన్నూ,కాలని మన్నూ అంటవు (అతకవు).

* కాలి మెట్లు తలకెక్కినట్లు.

* కాలి కడుగ ముంత లేదు, కల్లుకు కళాయి గిన్నె.

* కాలికాలిన పిల్లి వలె (తిరుగాడుట).

* కాలూ చెయ్యీ ఉన్నంతకాలం కాలం గడుస్తుంది.

* కాలు జారితే గంగానమ్మదే మహిమ - అన్నట్లు.

* కాలి జారితే తీసుకోగలం కానీ నోరుజారితే తిసుకోగలమా?

* కాలి జారితే పడి, నేల అచ్చివచ్చిందికాదు అన్నట్లు.

* కాలు జారినా మాట సాగినా పడమన్నారు.

* కాలు జారితే పట్టుకోవచ్చును గానీ మాటజారితే పట్టుకోగలమా?

* కాలు తొక్కినవేళ, కంకణం కట్టినవేళ.

* కాలు తొక్కిన మొగుడేనుగంత, కనిపెంచని బిడ్డ బారెడంత.

* కాలు పట్టుకొని లాగితే చూరు పట్టుకొని వ్రేలాడినట్లు.

* కాలు వంగిన కానీ గంగానమ్మయినా పట్టదు.

* కాలువ దాటలేని వాడు కడలి దాటగలడా?

* కాలు విరిగిన ఎద్దే గట్టెక్కితే, కొమ్ము విరిగిన ఎద్దెక్కదా?

* కాలే కడుపుకు మండే గంజి.

* కాల్చిన పందికొక్కులకు కొట్లాట పెట్టేవాడు.

* కాళిదాసు కవిత్వం కొంత, నా పైత్యం కొంత.

* కాళ్ళకు చుట్టుకొన్న పాము కరవక మానునా?

* కాళ్ళకు మొక్కేవాడుపోయి, కంఠాన్ని పట్టుకునేవాడు వచ్చినట్లు.

* కాళ్ళ దగ్గరకు వచ్చిన బేరం, కాశీకి పోయినా దొరకదు.

* కావడీ ఎన్ని వంకలు తిరిగితేనే? ఇల్లు చేరితే సరి.

* కాశీకి పోగానే కఱ్ఱి కుక్క గంగిగోవు అవుతుందా?

* కాశీకి పోయి కుక్కపిల్లను తెచ్చినట్లు.

* కాశీకిపోయి కొంగరెట్ట తెచ్చినట్లు.

* కాశికి పోయినవాడు, కాటికి పోయినవాడు ఒకటే.

* కాశికి పోయినా కర్మం తప్పలేదు.

* కాశికి పోయినా కావడి బరువు తప్పలేదు.

* కాశికి పోయి వచ్చింది మొదలుకొని, కామిశెట్టి ఒక్కడే గుద్దకడీగేది మావూళ్ళొ అన్నాడట.

* కాశిలో కన్ను మూసినా రాని పుణ్యం, కాళహస్తిలో కాలు పెడితే వస్తుంది.

* కాశిలో కాసుకొక లంజ.

* కాశిలో బెండను వదిలినాడుగానీ, ముండను వదలలేదు.

* కాశివాసులైనా కానలేరు మోక్షంబు.

* కాసిచ్చేదే గొప్ప కలిలో రాజులకు.

* కాసీ పూసే చింతా, గన్నారపు సంత, నీళ్ళకడవముంత, నిద్రకేమి పుచ్చుకుంటావే?

* కాసుకు కాలెత్తే దానికి కాశీయాత్ర కావలెనా?

* కాసుకు గతిలేదు, కోటికి కొడి ఎత్తినాడు. (కొడి=పతాకము).

* కాసుగలమ్మ కట్టవిప్పా, వీసంగలమ్మ విడవా మడవా.

* కాసు గొడ్డుకు రూక బందె.

* కాసును వెతుకగా రత్నము గన్న రీతి.

* కాసుకు మూతినాకబోతే మూడు నూర్ల ముంగర పోయిందట.

* కాసులకును దిరుగ కలుగునా మోక్షంబు.

* కాసులేనివాడు కడు బ్రహ్మచారియౌ.

**********:: కి ::**********

* కించిత్తు నల్లి గరచిన మంచమునకు పెట్లు వచ్చు.

* కింద ఒకబొంత, మీద ఒకబొంత, నాకేమి చింత?

* కింద పడినా మీసాలకు మన్ను కాలేదన్నట్లు.

* కిందపడ్డా, పీటికి మన్ను కాలేదు (పీట=వీపు)

* కిందపెట్టిన పంటలుండవు, పైన పెట్టిన వానలుండవు.

* కిందబెట్టిన పంటెలుండవు, పైన పెట్టిన బానలుండవు.

* కింద పడ్డా, పైచేయి నాదే అన్నట్లు.

* కింద మట్ట రాలుతుంటే, పైమట్ట నానవేస్తుంది.

* కిఱ్ఱులో కిఱ్ఱు కలిస్తే కంపేడకు పోతుంది?

**********:: కీ ::**********

* కీలెంచి మేలెంచవలెను.

* కీర్తిమార్గం కాటికే దారిచూపును.

* కీలూడిన యంత్రం-తొండములేని ఏనుగు.

* కీలెఱిగి వాత పెట్టలి.

**********:: కు ::**********

* కుంచమంత కూతురుంటే మంచం మీదే కూడు (తల్లికి).

* కుంచంలో కుదుళ్ళు పోసినట్లు.

* కుంచాలమ్మ కూడువేస్తే, మంచాలమ్మ మాయం చేసిందట.

* కుంచెడుంటే కుడికొప్పు, అడ్డెడుంటే ఎడమకొప్పు.

* కుంచెడు గింజలకు కూలిపోతే, తూమెడు గింజలు దూడలు తినిపోయినవట.

* కుంచెడున్నమ్మకు కూర్కు పట్టదు.

* కుంజరయూధమ్ము దోమ కుత్తుక జొచ్చినట్లు.

* కూంజరాశి ఉన్న గుహ ప్రవేశించునే, సత్యహీనమైన జంబూకంబు?

* కుంటి ఎద్దు రానిదే దూలమెత్తరు.

* కుంటికులాసం, ఇంటికి మోసం.

* కుంటి గాడిదకు జారిందే సాకు.

* కుంటి గుఱ్ఱానికి జారిందే సాకు.

* కుంటి గుఱ్ఱాలు, తోలు కత్తులు.

* కుంటివానికి కుయుక్తులెక్కువ.

* కుంటి వాని తిప్పలు కుంటివానికి, గూనివాని తిప్పలు గూనివానికి.

* కుంటివాని పారుపత్తెము ఇంటి ముందఱే.

* కుంటి సాకులు-కొంటె మాటలు.

* కుంటోడైనా ఇంటోడు మేలు.

* కుండ ఎప్పుడు వేఱో, కుదురు అప్పుడే వేఱు.

* కుండమార్పు మనువులు కూడైనావస్తవి, కుమ్మయినా అవుతవి.

* కుండను మూయను మూకుడున్నది గానీ, లోకుల నోరు మూయనేమున్నది?

* కుండల దుమ్మును రోకళ్ళతో దులిపినట్లు.

* కుండలు, చేటలు లేవని వండుకతినటం మానుకుంటామా?

* కుండలు దాచినా, కండలు దాచలేము.

* కుండలోకి కూడూ, గుదములోకి గూటాము తా తెచ్చుకుంటేనే గానీ రావు.

* కుండలో కూడుంటే, ముండకు నిద్ర రాదు.

* కుండలో కూడు కదలకుండా ఉండాల, బిడ్డలు మాత్రం పెరగాల.

* కుండలో కూడుమాత్రం కుండలో ఉండాల, బిడ్డ గుండ్రాయి మాదిరి కావాల.

* కుండలో గుఱ్ఱాలు తోలినట్లు.

* కుండలో మెతుకులన్ని పట్టిచూడవలెనా?

* కుండలో లేనిది నా సిండలోనుండి తెచ్చిపెట్టనా అన్నదిట.

* కుండవెళ్ళి బిందెకు తగిలినా, బిందె వచ్చి కుండకు తగిలినా కుండకే మోసం.

* కుండ వేరైతే, కులం వేరా?

* కుందేటి కొమ్ము సాధించినట్లు.

* కుందేలు దొరికే వేళకు కుక్కకు బయటికి వచ్చిందట.

* కుందేళ్ళతో గూడా పరుగెత్తి, కుక్కలతో గూడా వేటాడినట్లు.

* కుంపట్లో తామర మొలచినట్లు.

* కుంభకర్ణుని నోటికి అరకాసు మజ్జిగా?

* కుక్క ఇల్లు సొచ్చి కుండలు వెదకదా?

* కుక్క అతిమూత్రవ్యాధి, బంధువైరం లేకుంటే, గంటకు ఆమడదూరం పోతాఅన్నదిట (చూచినదాని మీదంతా కాలెత్తి ఉచ్చపోస్తు, కనబడ్డకుక్కలతో కలహిస్తూ పోతుంటుంది).

* కుమ్మ ఉట్టిచెర్లు తెంచగలదుకానీ, పాలకుండ పడకుండా పట్టగలదా?

* కుక్క ఎక్కలేక కాదు చచ్చేది, పెరుక్కోలేక.

* కుక్క గోవుకాదు, కుందేలు పులి కాదు.

* కుక్క కాటుకు చెప్పుదెబ్బ.

* కుక్కకు ఏమితెలుసు మొక్కజొన్న రుచి.

* కుక్కకు ఏవేషం వేసినా మొరగక మానదు.

* కుక్కకు కూడా కలిసివచ్చే కాలం ఉంటుంది.

* కుక్కకు కూడు వేస్తే కూటికుండకు ముప్పు.

* కుక్కకు జలతారు టోపీ పెట్టినట్లు.

* కుక్కకు నెయ్యికూడు పెట్టడం, చెడ్డజాతికి విద్య చెప్పినట్లు.

* కుక్కకున్న గుణము గురునకు లేదయా.

* కుక్కకు పులితోలు కప్పగానే కరవనేరుస్తుందా?

* కుక్కకు పుట్టేదంతా గొక్కిరిపండ్లే.

* కుక్కకు పెత్తనమిస్తే కుండలు కెలకదా?

* కుక్కకు పెత్తనమిస్తే చెప్పులన్ని కొరికి పెట్టిందట.

* కుక్క చింపిన విస్తరైనట్లు.

* కుక్క తెచ్చేవన్నీ గొద్దెలే.

* కుక్క కూయనేమి గుఱ్ఱమునకు లెక్క.

* కుక్కతోక గట్ట కుదురునా చక్కగా.

* కుక్కతోక వంకర తీర్చలేని వారు, ఏటివంకల తీర్చగలరా?

* కుక్కతోక పట్తుకొని గోదారి ఈదినట్లు (దాటినట్లు).

* కుక్కదానం పట్టి అయినా కుటుంబాన్ని పోషించాలి.

* కుక్కను అమ్మితే డబ్బు మొరుగుతుందా?

* కుక్కని ఎక్కితే సుఖమూ లేదు, కూలబడీతే దుఃఖము (నష్టమూ) లేదు.

* కుక్కను కొట్ట బచ్చనకోల కావలెనా?

* కుక్కను తెచ్చి అందలంలో కూర్చోబెడితే, కుచ్చులన్ని తెగకొరికిందట.

* కుక్కను గుఱ్ఱం వలె సాకి దొంగవస్తే రెడ్డే మొరిగినాడంట.

* కుక్కను పెంచితే గండాయె, కూటికుండకు చేటాయె.

* కుక్కను పందివలే పెంచి, దొంగవస్తే ఆలుమగలే మొరిగినారట.

* కుక్కను సింహాసనం మీద కూర్చోబెట్టినా వెనకటి గుణం మానదు.

* కుక్కను ముద్దు చేస్తే మూతెల్లా నాకుతుంది.

* కుక్కనోటికి టెంకాయ అబ్బునా?

* కుక్కపైన గొంగళి వేయగానే గంగిరెద్దు అవుతుందా?

* కుక్క బతుకు-నక్క చావు.

* కుక్క బలిస్తే గోనెలు మోస్తుందా?

* కుక్కబుద్ది దాలికుంటలో ఉన్నంతసేపే.

* కుక్క ముట్టిన కుండ అక్కఱకు వస్తుందా?

* కుక్క మొరిగితే జంగం పరపతి పోతుందా?

* కుక్క అరుపు ఊరిదారి చూపితే, నక్క అరుపు కాటి దారి చూపుతుంది.

* కుక్కల రంది ఏమిటంటే, చిత్తాకర్తె పెట్టిందేమో చూడు అన్నాడట.

* కుక్కలకు కులం పంచాయతా?

* కుక్కలు ఏకులు వడికితే, గుఱ్ఱాలు చీరలు కడతాయి.

* కుక్కలూ కుక్కలూ పోట్లాడుకొని, కూట్లో దుమ్ముపోసుకున్నాయట.

* కుక్కలు చెప్పులు వెదుకును, నక్కలు బొక్కలు వెతుకును, తక్కిన నా లంజాకొడుకు తప్పే వెదకున్.

* కుక్కలు మొరుగుతూనే ఉంటవి, సాతు (బిడారు) సాగిపోతూనే ఉంటుంది.

* కుక్కవంటి మనసు కూర్చుండనిచ్చునా?

* కుక్కవస్తే రాయి దొరకదు, రాయి దొరికితే కుక్క రాదు.

* కుక్క సంతకు పోయి వచ్చినట్లు (కొనదు-అమ్మదు).

* కుక్క సింహమగునే గోదావరికి బోవ.

* కుక్క స్వారీకి కుచ్చుల జీనా?

* కుక్కి చక్రమే (బండి) గోల చేసేది.

* కుచ్చి (గ్రుచ్చి) కుదుటిలో పెడితే, విచ్చికొని వీధిలోకి వచ్చినట్లు.

* కుచ్చెలక్రింద త్రాచువలె (కుచ్చెల=పేర్చిన పిడకల గుట్ట, పావడ).

* కుజనుడౌ వైద్యండు ప్రజకు రోగము గోరు, సామాన్య విప్రుండు చావు గొరు.

* కుటులమానవులకు గుణమేల కలుగురా.

* కుట్టని రవిక చేతిలో ఉన్నాసరె, ఏలని మొగుడు ఊరిలో ఉన్నా సరె.

* కుట్టికుట్టి గుంజాగానికి దుప్పటి నేయించినట్లు.

* కుడితే తేలు, కుట్టకుంటే కుమ్మరి పురుగు.

* కుట్టిన ఏడు కుట్టెండ, మరోఏడు మట్టెండ, మూడో ఏడు మొదలెండె.

* కుట్టిన చెవికి బుడగలు లేవు, మధ్యాహ్నం సద్దికి ఉప్పులేదు.

* కుట్టిన తేలు గుణవంతురాలు, కూసినమ్మ కుక్కముండ.

* కుట్టిన తేలు గుణవంతురాలు, కూసినముండ రాళుగాయి ముండ.

* కుట్టిన తేలు గోడకెక్కె, కూసులంజ రచ్చకెక్కె.

* కుట్టినమ్మ కుదుట్లో ఉంటే, కూసినమ్మ గయ్యాళి.

* కుట్టేవాడికి కుడి తట్టు, చీదేవాడికి ఎడమతట్టు ఉండరాదు.

* కుట్టేవారు చెవులు కుడీతే నొప్పెట్టవు.

* కుడికన్ను కుదేయ్యటం, ఎడమకన్ను ఎగురేయటం.

* కుడికాలు పెడితే కుల క్షయం, ఎడమకాలు పెడితే వంశ క్షయం.

* కుడిచి కూర్చుని గుదంలోకి మేకు తెచ్చుకున్నట్లు.

* కుడిచెయ్యి చేసే దానం ఎడమచెయ్యి ఎఱుగరాదు.

* కుడీచేతికున్న మన్నన ఎడమచెయ్యి కేది?

* కుడి చేతితో ఇచ్చి ఎడమచేత్తో తీసుకున్నట్లు.

* కుడితి కుండలో (తొట్టిలో) పడ్డ ఎలుకవలె.

* కుడితి పులుపే బఱ్ఱె బలుపు.

* కుడితి మరుగు బఱ్ఱె కూసిన చేపునా?

* కుడితి మరుగు బఱ్ఱె విడినీరు త్రాగునా?

* కుడుపు మంచిదైనా కడుపు మంచిది కాదు.

* కుడుము చేతికిస్తే పండుగనే వాడు. (అల్పసంతోషి)

* కుడుము మింగేవానికి అప్పడాలొక లెక్కా?

* కుడుములు వండని ఆడుదీ, కూనిరాగం తీయని మగవాడూ ఉండరు.

* కుడువబెట్ట కంచ మారడి గొనినట్లు.

* కుడువబోతూ కూరల రుచి అడగడమెందుకు?

* కుడువబోతూ కూరాకు రుచి అడిగినట్లు.

* కుడువ మంటే, పొడవ వచ్చినట్లు.

* కుత్సితునకు నేల గురు దేవతా భక్తి.

* కుదిర్చినదే వైద్యం, మాన్పినదే మందు.

* కుదిరెకు గుర్రమంటే, పూనెకు పుఱ్ఱమన్నాడట(కుదిరై=తమిళంలో గుఱ్ఱం).

* కుదువ సొమ్ముకు కొంత హాని.

* కుదురు (కుదుట) పడ్డ కాపురం కూలగొట్టకపోతే నీకు ఱంకు మొగుడినే కాదన్నాడట.

* కనప్పండగనాడు కంచంలో ఎముక ఘల్లుమంటే కాశీలో గంట మ్రోగించినంత పుణ్యం.

* కునికిపాట్లు పడేవానికి కూలబడి తన్నేవాడే తండ్రి.

* కుప్ప తగులబెట్టి పేలాలు వేయించుకొన్నట్లు.

* కుప్ప పీకే దొంగ పరిగ ఏరుకొనేవానిని బెదిరించినట్లు.

* కుప్పపై పండుకొని ఉప్పరిగా కలగన్నట్లు.

* కుప్పలో కేడిగింజ, కులంలో కులాల కోడలు.

* కుప్పలో ధాన్యమున్నట్లు.

* కుప్ప విత్తనాలు-చప్పనారు.

* కుమ్మక్కు నాది, ఫజీతు నీది. (ఫజీతు=అవమానము).

* కుమ్మరపురుగుకు మన్ను ఒంటబట్టునా?

* కుమ్మర వీధిలో కుండలమ్మినట్లు.

* కుమ్మరావంలో గచ్చకాయ వేసినట్లు.

* కుమ్మరావంలో రాగిముంతలేరగలమా?

* కుమ్మరికి ఒక ఏడు, గుదియకు ఒకఏటు (దెబ్బ).

* కుమ్మరికి కుండ కఱవా? కమ్మరికి తెడ్డు కఱవా?

* కుమ్మరికి కుండ కఱవు, సాలెకు బట్ట కఱవు ఉండునా?

* కుమ్మరికి కుండల కఱవు, మాదిగకు చెప్పుల కఱవు ఉండవు.

* కుమ్మరిలేకుండా కుండ పుట్టునా?

* కుమ్మరివారి కోడలు ఆవం దగ్గరైనా కనుపించదా?

* కుమ్మరివారింటి కోడలు ఆవంకట్టకు రాకుండా ఎక్కడీకిపోతుంది?

* కుమ్మకాదా కూతురా? అంటే ముసలి మొగుడే అమ్మా అన్నదిట.

* కుమ్ము చెప్పుకొనేదానికి గూడూరుపోతే, ఏడూళ్ళ కుమ్ము ఎదురుగా వచ్చిందట.

* కుమ్మెతక్క పూలుగుచ్చితే, కురిమెళ్ళ కామాక్షమ్మ కులికి వస్తుంది.

* కుమ్మేమిటే కూతురా? అంటే, అవ్వకు ఱంకుమొగుడే అన్నదిట.

* కురవోళ్ళ పిల్ల బాయిలో పడితే ఎలిగోళ్ళ పిల్ల ఎక్కి ఎక్కి ఏడ్చిందట (కురవళ్ళ పిల్ల=గొల్ల కురవజాతి పిల్ల).

* కురూపి పొత్తు కంటే, సురూపి తిట్టు మేలు.

* కురూపీ ఏంచేస్తున్నావంటే, సురూపాల వెక్కిరిస్తున్నాను అన్నట్లు.

* కుఱ్ఱవాడి గుణగణాలు తెలుసుగానీ, చెవులకమ్మల సంగతి మాత్రం తెలీదు అన్నట్లు.

* కులం కన్నా గుణం ప్రధానం.

* కులం కొద్ది గుణం.

* కులంగాదు, తలంగాదు, కురవోళ్ళపిల్ల దెయ్యమై పట్టిందట.

* కులంలో ఒద్దికుండి, నిరుడురోగం లేకుంటే, కుక్క ఆమడదూరం పోయివస్తా అన్నదిట.

* కులటబిడ్డ కొడూకగునా? మెఱపు దీపమగునా?

* కులనాశకుడైన కొడుకు దీర్ఘాయువైన నేమి లేకున్న నేమి?

* కులమింతి కోతి అయినా మేలు.

* కులముకన్నా నెన్న కలిమి ప్రధానంబు.

* కులము కాదు, స్ఠలము కాదు, కుమ్మరివారిపిల్ల కోరి దెయ్యమై పట్టిందట.

* కులము చెడ్డా సుఖం దక్కవలె.

* కులము చెఱిచేవారే గానీ కూడు పెట్టేవారు లేరు.

* కులము తక్కువ వాడు కూటికి ముందు.

* కులము తక్కువదానికి నీటు (టెక్కులు) ఎక్కువ.

* కులము తప్పిన వాడు బంతికి ముందు, కూరగాయలవాడు సంతకు ముందు.

* కులము వాళ్ళను చూస్తే కుక్కకు కోపం గుఱ్ఱానికి సంతోషం (కుక్క మొరుగుతుంది, గుఱ్ఱం సకిలిస్తుంది).

* కులమెఱిగి కోడలినీ, ఆణెమెరిగి ఆవును తీసుకోవాలి (ఆణెము=మంచి జాతి).

* కులమెఱిగి చుట్టము స్ఠలమెఱిగి వాసము.

* కులవిద్యకు సాటిరావు గువ్వల చెన్నా.

* కులహీనం ఐనా వరహీనం కారాదు.

* కులానికి ఇంత అంటే, తలా గోరంత అన్నట్లు.

* కులానికి కులం తెగులు. నీటికి పాచి తెగులు.

* కులానికి సొడ్డు అంటే, చిన్నప్పుడే వేఱుపడ్డాను అన్నట్లు.

* కులికే దాన్ని ఒలికిలో పెడితే, ఒలికంతా చెడ కులికిందట.

* కుళ్ళి కుళ్ళి కాయనష్టి, కాలి కాలి కట్టెనష్టి.

* కుళ్ళుబోతువాడు గుడిసె కడితే, కూలినదాకా ఒకటే పోరు.

* కుళ్ళుముండకి అల్లంపచ్చడి అన్నట్లు.

* కుళ్ళేవాని ముందు గునిసినట్లు.

* కుళ్ళేవాళ్ళ ముందే కులకమన్నారు.

* కుసివెళ్ళి గొడ్డలిలో దూరి కులానికే చేటు తెచ్చినట్లు.

**********:: కూ ::**********

* కూకున్న కూతురు కూలిపోయింది, చేసిన కోడలు చేవదేలింది.

* కూచం ఇంటికి బరువైతే, మీసం రోషానికి బరువౌతుందా?

* కూచమ్మ కూడబెడితే, మాచమ్మ మాయం చేసిందట.

* కూచిపూడి దొంగతనానికి కఱ్ఱ చెప్పులు కావలెనా?

* కూచిపూడిలో కుక్క మొరిగినా సంగీతమే.

* కూచుంటే లేవలేడు, కూరకట్టలమ్మ లేడు, కొట్టొస్తాడమ్మా! నాకు నవ్వొస్తాది.

* కూచుంటే లేవలేడు, కూరకచట్టి దించలేడు, మా బావ కొట్టొస్తాడే! నాకు నవ్వొస్తాదే.

* కూటికి గతిలేదుకానీ కుంటెనలకు ముత్యాలు.

* కూటికి గింజలు, పనికి కొరముట్లు లేక చేసే సేద్యం రోత.

* కూటికి జరిగితే కోటికి జరిగినట్లు.

* కూటికి తక్కువైతే కులానికి తక్కువా?

* కూటికి పేదైతే కులానికి పేదా?

* కూటికియ్యని విటకాని పోటు మెండు.

* కూటికి లేకున్నా కాటుక చుక్క మానదు.

* కూటికి లేని నాబట్టా, గుడ్డకులేని నా బిడ్డ వెంటబడ్డావా?

* కూటికుంటే కోటికున్నట్లు.

* కూటికుండ కుక్క ముట్టినట్లు.

* కూటిపేద తోడు పోగొట్టుకుంటాడు.

* కూటిమీదా ఆశ, మీసం మీదా ఆశ.

* కూటిలోని రాయి తీయలేనివాడు ఏటిలోని రాయి తియ్యగలడా?

* కూడబెట్టినవాడు కుడువ నేర్చునా?

* కూడబెట్టిన సొమ్ము కుడూవను రాదు.

* కూడలి కాపురం కుతకుతలు, వేరడి కాపురం వెతవెతలు.

* కూడా తిని కులమెంచినట్లు.

* కూడినకొద్దీ కుండలమ్ముకొని తినినట్లు.

* కూడి యాడెడువాడె పో గోవిందుడు.

* కూడుండగానే కులాలవాళ్ళ కుడిపైట మారదు.

* కూడు ఐతే కద్దుగానీ కులస్థులకు వెరచి వచ్చినాను.

* కూడు ఉంటే కులగోత్రాలెందుకు?

* కూడు ఉడకలేదని కుండట్టుక కొట్టాడట.

* కూడు ఉడీకిన వెనుక పొయ్యి మండును, కులం చెడ్డవెనుక బుద్ధి వచ్చును.

* కూడు ఎక్కువైతే కువ్వాడ మెక్కువ (కువ్వాడం=ఓర్వలేనితనం).

* కూడు ఒల్లనమ్మను కఱవేమి చేస్తుంది?

* కూడు గుడ్డ తానుగోరునా దైవంబు.

* కూడు కలుగగానే కులం మరచిపోతారు.

* కూడు గుండెకాయ, మెతుకు మేనమామ.

* కూడు చీర లేని చోటు కొరగానిది.

* కూడు పారవేసి కొప్పెర నాకినట్లు.

* కూడు పెట్టడు, గుడ్డ ఇవ్వడు, నామీద ప్రాణమే అన్నట్లు.

* కూడు పెట్టినామెను తొడవిందు అడిగినట్లు.

* కూడులేక కూరదిన్న ఆకలి తీరునా?

* కూడు లేనమ్మకు గుడ్డలేని వాడు జత పడ్డట్లు.

* కూడు వండని ఆడది, మంచం అల్లని మగవాడూ ఉండరు.

* కూడూవండుట గంజి కొరకా?

* కూడు వేడైతే కూరాకు నంజినట్లు.

* కూడూ, గుడ్డా అడక్కపోతే, బిడ్డని సాకినట్లు సాకుతా అన్నాడట.

* కూడేకూడే కాపురం తియ్యకపోతే నీ ఱంకు మొగుణ్ణి కాదన్నాడట.

* కూతలార్భాటమే కానీ కుప్పలో ఇత్తులు లేవు.

* కూతును గుత్తరూకలమ్మేవాడు అల్లునికి అరణమిచ్చునా?

* కూతురికి దొరికేదంతా కుళాయి మిండగాళ్ళే.

* కూతురుకి మంగళవారం, శుక్రవారం కోడలికి దివ్వెలు దివ్వెలు.

* కూతురి పురుడు కుండల్లో, కోడలి పురుడు కొందల్లో.

* కూతురు అని కుంచడిస్తే, కన్న తల్లి అని కంచెడు పెట్టిందట.

* కూతురు కనలేకపోతే అల్లుడి మీద పడి ఏడ్చినట్లు.

* కూతురు చెడితే తప్పు తల్లిది.

* కూతురు బిడ్డవని కోరితెచ్చుకుంటే కానే కొరివైనావా నా మనమరాలా?

* కూతుళ్ళ కన్నమ్మకు కుర్చీపీటలు, కొడుకులు కన్నమ్మకు గోడపంచలు.

* కూతుళ్ళుకన్నమ్మ కుశలేసులలో, కొడుకులు కన్నమ్మ లబ్బీసులో.

* కూనపులికి లేడి దేటా?

* కూనలమ్మ సంగీతం వింటే పుణ్యమూలేదు, వినకపోతే పాపమూ లేదు.

* కూనలు కూటికేడుస్తుంటే, అవ్వ ఱంకు మొగుడికేడ్చిందట.

* కూర ఎంతైనా కూడు కాదు.

* కూరకుండ మొదలుంటే, కూసుముండైనా చేస్తుంది కాపురం.

* కూరకు తాళింపు, చీరకు జాడింపు.

* కూరగాయలు చెడిపోయినవంటే, బఱ్ఱెలకు వేయమన్నాడట, అవి తినవంటే, పిలిచి బ్రాహ్మడి కివ్వమన్నాడట.

* కూరలేని తిండి కుక్క తిండి.

* కూరలో కసవేరినట్లు.

* కూరిమి కలిగిన దినములలో నేరములెన్నడును కలుగ నేరవు.

* కూరిమి విరసంబైనను నేరములే తోచుచుండు.

* కూర్చుంటే కుంటి, లేస్తే లేడి.

* కూర్చుంటే కుక్కైనా కఱవదు.

* కూర్చుండి కూర వందలేను, వంగుండి తీర్ధం వస్తాను అన్నట్లు.

* కూర్చుండి చేసినపాపం గుడి కట్టినా పోదు.

* కూర్చుండి తింటూ ఉంటే కొండయినా కరిగిపోతుంది.

* కూర్చుండి తింటే, గుళ్ళుగోపురాలు ఆగవు.

* కూర్చుండి లేవలేని వాడు, ఎగసి తాటికాయ తంతానంటాడు.

* కూర్చుండి లేవలేనమ్మ వంగుని శివరాత్రికి వస్తానన్నదిట.

* కూర్చున్నవానికి కుప్పలు, తిరిగిన వానికి తిప్పలు.

* కూర్చోమంటే గుద్దకు, తినమంటే నోటికి తెగులు.

* కూలబడీన కుండా కుదురుట అరుదయా.

* కూటికి ఏడిస్తే కొలుకులు తడౌతవా?

* కూలికి వచ్చి పాలికి మాట్లాడినట్లు.

* కూలి కుండకు రాదు, ఱంకు పన్నుకు రాదు.

* కూలి కూటికి రాదు, లేకి చేతికి రాడు.

* కూలి చేస్తే కుండకాలె, లేకుంటే పొట్టకాలె.

* కూలికి వచ్చినవాడు పనిగొనక మానునా?

* కూలిబంటు కొక మాలబంటు, మాలబంటు కొక మద్దెలకాడు.

* కూలీనాలీ చేసి కుదురాల ఉండక, మొగుణ్ణి కట్టుకొని సగమై పోతినే అందిట.

* కూలివాడి ప్రొద్దా, క్రుంకవే పొద్దా.

* కూశమ్మ కూడబెడితే మాశమ్మ మాయం చేసిందట.

* కూసుముండ నొరు కుట్టిపెట్టితే అయ్యవారా ఏం టెంకాయకు పసుపు పూయలేదు అన్నదిట.

* కూసే గాడిద వచ్చి మేసే గాడిదను చెఱచిందట (చెఱచినట్లు).

* కూసీకూసీ గుంటనక్క గూదెల్లి చచ్చిందట.

**********:: కృ ::**********

* కృతఘ్నత ప్రతిదేశంలో ప్రతివాతావరణంలో మొలిచే కలుపుమొక్క.

* కృతమెఱుంగని వానికి మిత్రద్రోహ మెంత?

* కృత్తికలో కుతికె పిసుకుడు.

* కృత్తికలో విత్తితే కుత్తుకలు నిండవు.

**********:: కె ::**********

* కెంపు నేనెఱుగనా? (కుంపటివలె) కోతికివలె రెండు కొమ్ములుండు.v

**********:: కై ::**********

* కైకపుట్టి చెరచెగా రాము(ని) పట్టంబు.

**********:: కొ ::**********

* కొంగ కన్నులు మూసుకోగానే దేవతల ధ్యానమగునా?

* కొంగకొక చెఱువనీ లేదు, కోమటికొక ఊరనీ లేదు.

* కొంగ జపము చేపల కొఱకే.

* కొంగలు గుమికూడి కొరకవా బోదెలు.

* కొంగ వంటి ధ్యానముచే తన కోర్కెలు నెరవేరునా?

* కొంగు తగిలినా కొంత మేలే.

* కొంగు తాకితే కోటివరహాలు.

* కొంచెమైనను పంచి కుడువ మేలు.

* కొంగు తడిస్తే చలిగానీ కోకంతా తడిస్తే ఏంచలి?

* కొంగు తడీస్తే వగకానీ, కోకంతా తడిస్తే వగపేమి?

* కొంటిమి, తింటిమి, కోలాటమెందుకు?

* కొంటే రానిది కొసరితే వస్తుందా?

* కొండంత తనతప్పు గోరంత, గోరంత ఒరుతప్పు కొండంత.

* కొండంత తెలివికంటే గోరంత కలిమి మేలు.

* కొండంత దూదికి కొండంత నిప్పెందుకు?

* కొండంత దేవునికి కొండంత పత్రి పెట్టగలమా?

* కొండంత దేవునికి గోరంత బెల్లం నైవేద్యం.

* కొండంత మదపుటెనుగకి తొండము లేకపోతే జంత్రము కీలూడినట్లు.

* కొండంత రాగంతీసి పిచ్చికుంట్ల పాట పాడినట్లు.

* కొండంత రెడ్డి కొంగుపట్టుకుంటే లేదనేదెట్లా అన్నదిట.

* కొండంత మొగుడేపోగా పిడికెడు బొచ్చుకెందుకు ఏడ్పు?

* కొండ అద్దమందు కొంచమై ఉండదా?

* కొండ ఎక్కేవాని ముడ్డీలో కొడవలి చెక్కినట్లు.

* కొండ ఎక్కేవాని ముడ్డిలో (గుద్దలో) కొడవలి చెక్కి వచ్చేటప్పుడు పచ్చిగడ్డి తెమ్మన్నట్లు.

* కొండకు కట్టెలు, కోనేటికి నీళ్ళు మోసినట్లు.

* కొండకింద మెరక, తూము కింద మెరక మంచిది.

* కొండకు వెంట్రుక ముడీవేస్తే, వస్తే కొండే వస్తుంది, పోతే వెంట్రుకే పోతుంది.

* కొండతో తగరు ఢీ కొన్నట్లు.

* కొండనాలుకకు మందు వేస్తే ఉన్ననాలుక కాస్తా ఊడి (ఊడ్చుకొని) పోయిందట.

* కొండను చదరపెట్టి, ఉలవ చల్లినట్లు.

* కొండను తలకింద పెట్టుకొని రాళ్ళను వెతికినట్లు.

* కొండను తవ్వి ఎలకను పట్టినట్లు.

* కొండమంగలి గొరిగినట్లు.

* కొండలు మింగేవానికి గోపురాలడ్డమా? గుడి మింగేవానికి లింగమడ్డమా?

* కొండమిరపకాయ కారం జాస్తీ, పొట్టివానికి బుద్దులు జాస్తి.

* కొండమీద గోల ఏమంటే కోమట్ల గుసగుసలన్నట్లు.

* కొందమీంచి పడ్డవానికి గాయాలెన్ని- అన్నట్లు.

* కొండమీదికి భక్ష్యాలకి పోతే కొండకింద పాయసం పోయిందట.

* కొండముచ్చు పెళ్ళికి కోతి పేరంటాలు.

* కొండలు పడ్డ కొన్నాళ్ళకి కోనలూ పడూను.

* కొండలు పిండి కొట్టినట్లు.

* కొండవలేవచ్చి మంచువలే తేలినట్లు.

* కొండవలే వచ్చి బెండువలే తేలినట్లు.

* కొండవీటి చేంతాడు.

* కొండవీటి దండుముండా, కుండలిటు తేవే.

* కొండీ! కొండీ ! కుండలిటు తేవే అంటే, చస్తి నీ కాళ్ళకు మొక్కుతా, దీపమిటుతే అందిట.

* కొండూరు జంగాలు, తరుణాయి సన్నాసులు.

* కోండ్రను నమ్మిన వారికి కొదువలేదు.

* కొందరిని కొంతకాలం ఏమార్చవచ్చునుగానీ, అందరినీ అంతకాలమూ ఏమార్చలేము.

* కొంప అంటుకపోతూ ఉంటే నీళ్ళబాన నిప్పు దగ్గర పెట్టిందట.

* కొంపచెరుపకురా సుపుత్రా!

* కొక్కిరాయీ! కొక్కిరాయీ ! ఎందుకు పుట్టావే ? అంటే చక్కని వాళ్ళని వెక్కిరించటానికి అన్నదట.

* కొక్కిరాయుళ్ళలో కొంగ ఘనము.

* కొక్కొరొక్కో అనగానే తెల్లవారినట్లా?

* కొక్కు బోనులోన చిక్కి చచ్చినరీతి.

* కొట్టకముందే ఏడుస్తావేంటే? అంటే, ముందు కొట్టబోతావని ఏడుస్తున్నా అన్నట్లు.

* కొట్టావద్దు తిట్టావద్దు వట్టలు పిసికితే వాడే చస్తాడు.

* కొట్టినా వంగని కొడుకు, తిప్పినా తిరగని మీసం.

* కొడితే కొట్టాడు కానీ కొత్త కోక పెట్టాడు.

* కొడుకు ఏడ్చిన ఏడ్పుకు అబ్బ బందరాకు మోయలేక చచ్చాడుట.

* కొడుకు కలిగినంత కులముద్దరించునా?

* కొడుకు పెళ్ళిసంగతి యోచించేప్పుడు మనమళ్ళ మనవర్తి సంగతిగూడా మనసులో పెట్టుకోవాల.

* కొడూకు బాగుండాల (చల్లంగుండాల) కోడలు ముండమోయాల.

* కొడుకు బిడ్డకు, కూతురు బిడ్డకు తాత ఒకడే.

* కొడుకు మనవాడైతే కోడలు మనదౌతుందా?

* కొడుకు మర్మం కన్నతల్లి కెరుకగాక, అడవిలోతిరిగే అయ్యకేమి తెలుసు?

* కొడుకు ముద్దు, కోడలు మొద్దు.

* కొత్త అప్పుకుపోతే పాత అప్పు పైనపడ్డదట.

* కొత్త ఆవకాయ, కొత్తపెళ్ళాము రుచి.

* కొత్త ఎద్దు పేడ ఇంటిల్లిపాది ఎత్తినట్లు.

* కొత్త ఒక వింత, పాత ఒక రోత.

* కొత్త కలిమి సేవ కత్తిమీద సాము.

* కొత్త కృషికి పాత తరినేల.

* కొత్త కదరా కొమ్మా ! అంటే, మరగనీరా ఇరగ (విరగ) తందాం అన్నట్లు.

* కొత్తగా సిరి వస్తే అర్ధరాత్రి గొడుగు పట్టమన్నాడుట.

* కొత్తగుడ్డకు రంగు పట్టినట్లు పాతగుడ్డకు పట్టదు.

* కొత్త చింతకాయతొక్కు, కొత్త చుట్టరికం రుచి.

* కొత్త చీపురు బాగుగా ఊడ్చు. (చిమ్మునట్లు).

* కొత్త జవ్వనమునకు గురుతలేదు.

* కొత్తది గొఱ్ఱెల మడుగు (ఉచ్చగుంత), పాతది బఱ్ఱెల మడుగు.

* కొత్తది నేర్వలేదు, పాతది మరువలేదు.

* కొత్తదొక వింత, కోడీకల బొంత.

* కొత్తనీరు వచ్చి పాతనీరు కొట్టుకపోయినట్లు.

* కొత్తనీళ్ళకు చేప లెదురెక్కినట్లు

* కొత్తబిచ్చగాడు పొద్దెరుగడు.

* కొత్త భక్తురాలు ఉడుకు ఊబిది పూసుకొని, నొసలు కాలెనే పేరమ్మా అన్నదట.

* కొత్త మురిపెము కొమ్మన్నా ! తెల్లగా కొట్టరా మడేలా (మడేలు=చాకలి).

* కొత్త వైద్యుని కంటే పాత రోగి మేలు.

* కొత్త సేద్యగాడు పొద్దెరుగడు.

* కొద్ది కొద్దిగా తీస్తే కొండయినా కరిగి (తరిగి) పోతుంది.

* కొద్ది వానలకే రెక్కల పురుగులు.

* కొనగా తీరనిది కొసరితే తీరునా?

* కొనజాలకు కోతిపుడితే కులమువాళంతా కుంటికుక్క అని పేరు పెట్టారు.

* కొనలేదు, అనలేదు, కొడుకుపేరు సోమలింగం.

* కొని తింటూ ఉంటే కోమటి నేస్తం, ఇచ్చి తీసుకుంటా ఉంటే ఈడిగ నేస్తం.

* కొనేది కొయ్యగూర, తినేది చెంచలకూర.

* కొనేవాడికి కోటి కళ్ళయితే అమ్మేవాడీ అవిటిదొక్కటే చాలు.

* కొనైనా కొసకు నూనె రాయాలి.

* కొన్న అంగడిలోనే మారు బేరమా?

* కొన్న కాంతలు, వన్నె చీరలు, దైవలోక మగునా?

* కొన్న దగ్గర కొసరుకానీ, కోరిన దగ్గర కొసరా?

* కొన్నది వంకాయ, కొసరింది గుమ్మడికాయ.

* కొన్నవాడికన్నా తిన్నవాడే మేలు.

* కొన్నాక తినక మానదు.

* కొన్నాళ్ళు చీకటి , కొన్నాళ్ళు వెన్నెల.

* కొప్పుకు సగరం (సవరం) అందం, చెప్పుకు తగులం అందం.

* కొప్పున్నామె ఎటు తిప్పినా అందమే.

* కొమ్ము మాడ కూలుస్తుంది.

* కొమ్ములు చూసి బేరమాడినట్లు (నీటనున్న పశువును).

* కొయ్యబొమ్మను తెచ్చి కొట్టినా పలుకునా?

* కొయ్యరా కొయ్యరా కోటిగాడా అంటే, టంగుటూరి మిరియాలు తాటికాయలంతేసి అన్నాడుట.

* కొఱకబోతే పడికట్లు ఉరికి మీద పడినట్లు.

* కొఱతనపడేవాడు ఒకడు, కూర్పులు లెక్కపెట్టెవాడొకడు.

* కొఱివితో తల గోక్కున్నట్లు.

* కొఱివి పెట్టెవాడు కొడుకు, కూడుపెట్టేది కూతురు.

* కొఱ్ఱకు నక్క కొఱ్ఱ.

* కొఱ్ఱగింజంత కోడలిని చూస్తే కొండంత జ్వరం వచ్చిందట.

* కొఱ్ఱల సేవ్యం (సేద్యం) కూటికైనా రాదు.

* కొఱ్ఱు ఇంటికంబమగునా?

* కొలని హంసలకడ కొక్కెరలుండునా?

* కొలిమి వీధిలో సూదులమ్మినట్లు.

* కొలుచు దంచుట పొట్టకొరకా? (కొలుచు=ధాన్యము).

* కొలువు కన్నా గోపాలనే నయం.

* కొల్లకు పోయి పైచీర కోల్పోయినట్లు.

* కొల్లు మునిగిన కొన్నాళ్ళకు కోనా మునుగుతుంది.

* కొల్లేటి పంట కూటికే చాలదు.

* కొల్లేటి బ్రహ్మహత్య కాపు మీదుగా కొట్టుకపోయినట్లు.

* కొల్లేటిలో పండే పంట పంటలో లెక్కేకానీ, చచ్చే దున్నపోతులకు లెక్కేలేదు.

* కొల్లేటి వ్యవసాయానికి కోతకూలి దండుగ.

* కొల్లేటి వ్యవసాయం గొడ్ల వినాశం.

* కొవ్విన ఎండ్రకాయ కలుగులో నిలువనట్లు.

* కొసరిన కూరలోగానీ పస ఉండదు.

**********:: కో ::**********

* "కో" అంటే కోటిమంది.

* కోకకు పెట్టిన గంజి కూడి రాదు.

* కోకడాపుతో కోరికలీడేరేనా?

* కోకలు వెయ్యున్నా కట్టుకొనుట ఒకటే.

* కోటగోడల ఇల్లు, తాటాకుల పందిరి.

* కోటచక్కదనము గమిడి చెప్పినట్లు.

* కోటలో పాగా వేసినట్లు.

* కోటవరకు, ఏటివరకు సాగనంపవలె.

* కోటికి పడగలెత్తినవాణ్ణి పదివేల కాపవై బ్రతుకమన్నట్లు.

* కోటికి లాగితే బిళ్ళకు, బిళ్ళకు లాగితే కోటికి.

* కోటిపల్లి గుళ్ళు ఎవరు కట్టించారో తెలియదుకానీ, అంతర్వేది గుళ్ళు నేను కట్టించలేదు అన్నాడట.

* కోటివిద్యల కంటే కోరుకు పొలం దున్నటం మేలు.

* కోటివిద్యలు కూటికొరకే.

* కోతివిద్యలు కొండ్రకు లోకువ.

* కోటివిద్యలు వచ్చినా కొల అచ్చితే కొలవలె కాదు.

* కోడలా! కోడలా! కొడుకు కోడూరు పోయెనే, నీకు కోకెక్కడిదే? అంటే, అత్తా! అత్తా! మామ మడమనూరు పోయెనే, నీకు మట్టెలెక్కడివే అన్నదిట.

* కోడలా నీ భోగం ఎంతసేపే? అంటే, మా అత్త మాలవాడకు పోయి వచ్చేదాకా అన్నదిట.

* కోడలికి బుద్ధిచెప్పి అత్త తెడ్డు నాకిందట.

* కోడలికి బుద్ధిచెప్పి అత్తే ఱంకు పోయిందట.

* కోడలిదాని మొగుడు కొట్టం పట్టుకొని ఏడ్చాడట.

* కోడలి కొట్టిన కుండ కొత్తకుండ, అత్త కొట్టిన కుండ అడుగోడు(టి) కుండ.

* కోడలి కొడుకును కంటాను అంటే వద్దనే అత్త ఉన్నదా?

* కోడలు గృహప్రవేశం, అత్త గంగా (అగ్ని) ప్రవేశం.

* కోడలి నలుపైతే కులమంతా నలుపగునా?

* కోడలు వచ్చినవేళ, కోడెలు వచ్చినవేళ.

* కోడి అడుగులో కోటివర్ణాల భూమి.

* కోడికి ఉన్న కోర్కెలతో పిల్లికేమి అక్కఱ?

* కోడికి కులాసం లేదు, కోమటికి విశ్వాసం లేదు.

* కోడికి గజ్జలు కడితే కుప్ప కుళ్ళగించదా?

* కోడికి పుట్టిన పిల్ల కొక్కొరొక్కో అనక ఏమంటుంది?

* కోడి కుళ్ళగించేదంతా (గెలికేదంతా) పెంటకుప్పలే.

* కోడి, కుంపటి లేకపోతే తెల్లవారదా?

* కోడి కూతా, కాడి పూత.

* కోడి కొత్త అప్పులు, పండి పాత అప్పులు తీర్చును.

* కోడిగుడ్డంత సంసారంలో కోరికలేలా?

* కోడిగుడ్డుకు ఈకలు పీకినట్లు.

* కోడిగుడ్డును కొట్టను గుండ్రాయి కావాలా?

* కోడిగుడ్డుతో కొండలు బద్దలు కొట్టగలమా?

* కోడితొక్కుడు, గాడిద ఎక్కుడు.

* కోడి నలుపైనా గుడ్డు తెలుపే.

* కోడిపియ్యి మందంటే కొఱ్ఱెక్కి ఏరిగిందిట.

* కోడిని అడిగి మసాలా నూరుతారా?

* కోడిని కోసి, గోత్రానికంతా పగ ఐనట్లు.

* కోడిని కోసే ఇంట్లో కొరకొర తప్పదు.

* కోడిని తిట్టిన తిట్టు కోడలి కెఱుక.

* కోడిపిల్లకు గొఱ్ఱెపిల్లను బలాదూరు (దిష్టి) తీసినట్లు.

* కోడిపెట్ట ఎక్కడున్నా మనసు గుడ్లమీదే.

* కోడి ఱెక్కారవేస్తే గొప్పవాన కురుస్తుంది.

* కోడు ఒకడు తీస్తే, కొమ్ము ఒకడు తీస్తాడు.

* కోడెల పోట్లాట మధ్య లేగల కాళ్ళు విరిగినట్లు.

* కోతల కాలంలో ఎలకన్నకు ఏడుపెళ్ళాలుంటే మాత్రం ఏమీ?

* కోడెలు కోడెలు పోట్లాడి, దూడల కాళ్ళు విరగకొట్టినట్లు.

* కోతలకు ఉత్తరకుమారుడు.

* కోతలున్నన్నాళ్ళూ కోతీ బతికింది, తరువాత బతికిందే బతుకు.

* కోతల్లో కునికిపాట్లు పడి, కొత్త అమావాశ్యకు కొంపగోడి అనుకున్నట్లు.

* కోతల్లో కూడదీసుకుంటే, కూటికి కొరత ఉండదు.

* కోతికి అద్దం చూపినట్లు.

* కోతికి కల్లు తాగించినట్లు.

* కోతికి టెంకాయ దొరికినట్లు.

* కోతి చస్తే గోడవతల పారేసినట్లు.

* కోతికి తేలు కుట్టినట్లు.

* కోతికి జల్తారు కులాయి పెట్టినట్లు.

* కోతికి పుండైతే, గోకా, నాకా.

* కోతికి పెత్తనమిస్తే, గోదావరి కడ్డంగా ఈదిందట.

* కోతికి పెత్తనమిస్తే, తలంతా చెడ గొరిగిందట.

* కోతికి బెల్లం చూపరాదు, కోమటికి ధనం చూపరాదు.

* కోతి గెంతడం, సాయబు సంపాదించడం.

* కోతిగుంపుల పాడు కొడవలూరు.

* కోతి చావు, కోమటి ఱంకు.

* కోతిచేతి పాము వలె.

* కోతిచేతి పూలదండ.

* కోతి టెంకాయ తుంచగలదు కానీ నీరు తాగగలదా?

* కోతి పంచాయతి కొంపలారుస్తుంది.

* కోతి పిల్లలకు రొట్టె పంచినట్లు.

* కోతిపుండు బ్రహ్మండమైనట్లు.

* కోతిపుండు బ్రహ్మరాక్షసి అయినట్లు.

* కోతి పులి కాదు, కోమటి దొర కాడు.

* కోతిముండకైనా గీత బాగుండవలె.

* కోపం గొప్పకు ముప్పు, అల్లరికి హంగు ముప్పు.

* కోపం పాపమునకు పొత్తు.

* కోపం పొంగు క్రుంగు కొన్నాళ్ళే.

* కోపం రాను కారం తిన్నట్లు.

* కోపము ఎదుటు గొప్పగొద్దు లెరుగదు.

* కోపానికి పోయిన ముక్కు శాంతానికి రాదు.

* కోమటి ఇల్లు కాలినట్లు.

* కోమటి ఏవేళా క్షేమామే కోరును, ధరణీపతి ధనము కోరు.

* కోమటికి, కోతికి ముల్లెచూపరాదు.

* కోమటితో మాట, కోతితో సయ్యాట.

* కోమటిని చూచి నక్క శొంఠి అడిగిందట.

* కోమటి భక్తుడు కాడు, తగరం కత్తి కాదు.

* కోమటి లేమి, కంసాలి కలిమి ఉండవు.

* కోమటి సాక్ష్యం, బాపన వ్యవసాయం.

* కోమటి వైష్ణవము, ఉప్పర సన్యాసము.

* కోమట్ల కోట్లాట, గోచీల ఊగులాట.

* కోమలి విశ్వాసము పాములతో చెలిమి వంటిది.

* కోరి అడిగితే కొమ్మెక్కుతారు.

* కోరికలు కొండలెక్కుతుంటే అదృష్టాలు అడుగంటుతుంటవి.

* కోరికోరి బావతో పోతే కుంటివాడు పుట్టాడట.

* కోరినంత పెట్టెనమ్మా కోతికి శివుడు

* కోరి పిల్ల ఇస్తామంటే, కులం తక్కువ అన్నట్లు.

* కోరి, వీగీ కొడుకును కంటే, మూగ చెవుడు ముంచుకు వచ్చినవట.

* కోరుకున్న కోడలు వస్తే కొప్పులో చెప్పు పెడుతుంది.

* కోరుకొండ తీర్ధానికి కోడిగుడ్డంత మామిడిపండ్లగును.

* కోరు గింజలు కొంగులోకే సరి.

* కోల ఆడితే కోతి ఆడును.

* కోలలేని పెట్టు, తాడులేని కట్టు.

* కోళ్ళను తింటారా? అంటే బొచ్చు పారేస్తాము అన్నట్లు.

* కోళ్ళ బేరానికి వెళ్ళి కోటలో కబుర్లడిగినట్లు.

* కోళ్ళు కూయగా లేచినా, కాళ్ళు కాలేవఱకే అవుతుంది.

* కోళ్ళుసాకిన పొంతలో రెట్టవేసినట్లు.

* కోర్టుకెక్కి గెలిచినవాడు ఇంట్లో ఏడిస్తే, ఓడినవాడు వీధుల్లో ఏడుస్తాడు.

* కోర్టుకెక్కిన వారు, ఒకరు ఆవుకొమ్మును, ఇంకొకరు తోకను పట్టుకుంటే, మధ్య వకీలు పొదుగు దగ్గర కూర్చుంటాడు.

**********:: ఖా ::**********

* ఖాజా (ఖొజ్జా) మొగుడు ఒడిలో ఉంటేనేమి, దడిలో ఉంటే నేమి?

* ఖాజీని ఫాజీ గానూ, ఫాజీని ఖాజీగాను మార్చినట్లు.

* ఖానాకు నహీ, ఎల్లీకి బులావ్ అన్నట్లు.