తెలుగు సామెతలు - జ , జా , జి , జీ , జు , జె , జే , జై , జొ మరియు జో

* జంగమైన వెనుక జాతినెంచగరాదు.

* జంగానికి పిల్లలు పుడితే, ఊరివారి గోడు పోసుకున్నాడట.

* జంగానికి బిడ్దలు ఊరికి ఉపాధి.

* జంగాలపాలు దేవాంగుల విత్తము, కాపు విత్తం పంజుగాని పాలు (పంజుగాడు=దివిటిలు పట్టేవాడు).

* జంగాలో! దాసర్లో ! ముందూరుని బట్టి.

* జగడమెట్లా వస్తాది లింగమయ్యా అంటే, బిచ్చంపెట్టవే బొచ్చుముండా అన్నాడట.

* జగ బిరుదు, ముండమొఱ్ఱ.

* జగమెరిగిన బ్రాహ్మడికి జందె మెందుకు?

* జడరాశిలో దాగని జడబానలమా?

* జడ్డిగములోనే మిడతపోటు.

* జన మర్లు, జాతర మర్లు.

* జనవాక్యం కర్తవ్యం.

* జనుములో పాము పోతే పాతిక నష్టం.

* జన్మానికంతా శివరాత్రి అన్నట్లు.

* జన్నెరోగికి బఱ్ఱెజున్ను పెట్టినట్లు, పిల్లి నెత్తిన వెన్న పెట్టినట్లు.

* జపం వదిలి లొట్టల్లో పడినట్లు.

* జబ్బబలిమి మీద బలాత్కార గానవినోదమన్నట్లు.

* జమ్మి ఆకుతో విస్తర కుట్టినట్లు.

* జనముండేవరకూ భయము లేదు.

* జయాపజయంబు లెవరి సొమ్ము?

* జరిగితే జల్లెడతో నీళ్ళు మోస్తారు.

* జరిగేమటుకు జయభేరి, జరక్కపోతే రణభేరి.

* జరుగుబాటుంటే జ్వరమంత సుఖంలేదు.

* జరుగుబాటు తక్కువ, అదరి(రు)పాటు ఎక్కువ.

* జలుబు మందుతింటే వారం దినాలుంటుంది, తినకపోతే ఏడుదినాలుంటుంది.

* జలుబు విచారణ లేని జబ్బు.

* జవ్వాది పూసుకొని చంక లెత్తినట్లు.

* జ్వర జిహ్వకు పంచదార లేదు.

**********:: జా ::**********

* జాణకు మూడుతావు లంటును.

* జాణలకు పురాణాగమశాస్త్రవేదజప ప్రసంగ త్రాణకల్గి ప్రయోజనమేమి?

* జాతికొద్దీ బుద్ధి, కులంకొద్దీ ఆచారం.

* జాతినాగుల చంపుతూ, ప్రతిమనాగులకు పాలుపోసినట్లు.

* జాబు వ్రాసిపెట్టమంటే, కాళ్ళు నొప్పులంటే, వాటితో పనేమంటే, నేను రాసింది నేనే చదవాలన్నాడట.

* జామాతా దశమగ్రహం.

* జారతోడి పొందు చావునకే యగు.

* జారితే పడమన్నారు, జరిగితే (సాగితే) పడమన్నారు.

**********:: జి ::**********

* జింక కన్నీరు వేటగానికి ముద్దా?

* జింకకు కొమ్ములు బరువా?

* జిలిబిలి పలుకుల వెలది నకారగుళ్ళ పాలైనట్లు (నకారగుళ్ళు=నియోగులు).

* జిల్లేడు పూలకు తుమ్మెద లాశించినట్లు.

* జిల్లేళ్ళకు మల్లెలు పూయునా?

* జివ తక్కువ, జీత మెక్కువ.

* జిహ్వ కొక రుచి, పుఱ్ఱె కొక బుద్ధి.

* జిహ్వచేత నరులు చిక్కి నొచ్చిరిగదా.

**********:: జీ ::**********

* జీతంబెత్తం లేకుండా తోడేలు గొఱ్ఱెలను కాస్తానన్నదిట.

* జీతంలేని నౌకరు, కోపంలేని దొర.

* జీతగాడికి, నేతగాడికి చావులేదు.

* జీతగాడు అతగాడైనట్లు.

* జీలకఱ్ఱా సింగినాదం.

* జీలుగు (జీలగ) పెఱిగిన మాలెకు కంబము కాదు.

* జీలగ బెండ్లు చెవుల పెంచుతాయిగానీ కుండలాలిస్తాయా?

* జీవరత్నాన్ని ఇత్తడిలో పొదిగితే రత్నానికేమి లోటు?

* జీవితమొక వ్యాధి, నిద్రావస్థ ఉపశమనము, మరణమే ఆరోగ్యము.

**********:: జు ::**********

* జుట్టుంటే ఎన్ని జడలైనా వెయ్యవచ్చు.

* జుట్టుకాలి ఏదుస్తుంటే, చుట్ట నిప్పడిగినట్లు.

* జుట్టు ఉన్న అమ్మ ఏకొప్పయినా పెట్టవచ్చు.

* జున్ను రుచి వెన్నకబ్బునా?

**********:: జె ::**********

* జెముడుకు కాయలూ లేవు నిలువ నీడాలేదు.

* జెముడు కంచెకు శ్రేష్టం, రేగడ చేనికి శ్రేష్టం.

**********:: జే ::**********

* జేనెడు ఇంట్లో మూరెడు కఱ్ఱ.

* జేనెడు దొరకు మూరెడు బంటు.

* జేనెడు పిట్టకు మూరెడు తోక.

* జ్యేష్ట చెడకురియును, మూల మురుగ కురియును.

**********:: జై ::**********

* జైనవాని చేతి పేనువలె. (చంపడనుట).

**********:: జొ ::**********

* జొన్న పెరిగితే జాడు, వరిపెరిగితే వడ్లు.

**********:: జో ::**********

* జోగీ జోగీ రాసుకుంటే, బూడిద రాలిందట.

* జోడులేని బ్రతుకు, త్రాడులేని బొంగరం.

* జోరీగల గొడ్డుకు గోరోజనం మెండు.

* జోలి పల్కులు తీసేలోగా బిక్షపు వేళ పోయిందట.