తెలుగు సామెతలు - ఎ , ఏ మరియు ఐ
* ఎంగిలాకులు ఎత్తమంటే, వచ్చినవాళ్ళను లెక్కపెట్టినాడట.
* ఎంగిలికి ఎగ్గులేదు, తాగుబోతుకు సిగ్గులేదు.
* ఎంగిలిచేత (తితో) కాకిని తోలనివాడు (అదల్చనివాడు) భిక్షంపెట్టునా?
* ఎంగిలితిండికి ఆపోశనం ఎత్తవలెనా?
* ఎంగిలిబూరెను కడిగినట్లు.
* ఎంచకురా పంచుకుంటావు.
* ఎంచబోతే మంచమంతా కంతలే.
* ఎంచిన ఎరువేదిరా అంటే, యజమాని పాదమే.
* ఎంచివేస్తే ఆరి తరుగుతుందా?
* ఎండ్రకాయ కొవ్వితే కలుగులో నిలువదు.
* ఎండ్రకాయ కొవ్వినా, యానాది కొవ్వినా కలుగులో ఉందరు.
* ఏండకాచిన నాడు ఏకులు వడికి, వానకురిసిన నాడు పత్తి పట్టుకున్నట్లు.
* ఎండకు పెట్టీన టోపీ, వడగండ్లకాగునా?
* ఎండకాసిన చోటే, వెన్నెల కూడా కాసేది.
* ఎండబడితే ఉండబడుతుంది, ఉండబడితే వండబడుతుంది, వండబడితే తిండిపడుతుంది, తిండిపడితే కండపడుతుంది.
* ఎండమావుల్లో నీరు ఎందుకెక్కినట్లు?
* ఎండ మిడిసికాసినా చీకట్లకి గుహలుండనే ఉండును.
* ఎండాకాలంలో ఏకులువడికి వానాకాలంలో వడ్లుదంచినట్లు.
* ఎండావానా కలిస్తే కుక్కలకు నక్కలకు పెండ్లి.
* ఎండావానా వస్తే నక్కలపెళ్ళి.
* ఎండితే తరుగుతుందని పచ్చిదే తినేవాడు.
* ఎండిన ఉళ్ళగోడు ఎవడికి కావాలి? పండిన ఊళ్ళకు అందరూ ప్రభువులే.
* ఎండినమోడుకు ఎఱ్ఱనిపూలు తగిలిచినట్లు.
* ఎండునేలమీద ఎండ్రకాయ కనపడితే వాన తప్పదు.
* ఎండు పండు లేకుండా ఉంటుందా?
* ఎండు మామిడి టెంకలు ఒళ్ళో పెట్టుకొని, ఎవరి త్రాడు తెంప వచ్చావోయి వీరన్నా అన్నదిట.
* ఎంత ఉన్నవాడైనా ఒక్కసారి ఒకే ముద్ద మింగగలడు.
* ఎంత ఉప్పుతింటే అంత దాహం.
* ఎంత కఱవు ఐనా పులి పూరీ మేస్తుందా?
* ఎంత చెట్టు కంత గాలి.
* ఎంత చెట్టు కంత పాటు.
* ఎంత చేసినా ఎడమచేతి కడియం కుద(దు)వే.
* ఎంత దరిగిన మిరియాలు జొన్నలు సరిపోవే?
* ఎంత తోండమున్నా దోమ ఏనుగు కాదు.
* ఎంత దయో దాసులపై అన్నట్లు.
* ఎంత నేరిచినా ఎంతజూచినా ఎంతవారలైన కాంత దాసులే.
* ఎంత పండినా కూటికే, ఎంత ఉండినా కాటికే.
* ఎంతపెద్ద చెట్టు ఎక్కినా ముడ్డి నేలనే చూస్తుంది.
* ఎంత పెద్దవారికైనా ముడ్డి పీతికంపే.
* ఎంత పెరిగినా గొఱ్ఱెకు బెత్తెడే తోక.
* ఎంత పొద్దుండగా లేచినా తుమ్మగుంటవద్దనే తెల్లారుతుంది.
* ఎంత పొద్దుకాడ లేచినా చింతగుంటపాలెం దగ్గరే తెల్లవారుతుంది.
* ఎంత పోట్లాడుకున్నా కల్లుదుకాణం కాడ ఒక్కటే.
* ఎంత ప్రాప్తో అంత ఫలం
* ఎంతమంచి కత్తి అయినా తన పిడిని గంటు చేయదు.
* ఎంత మంచి గొల్లకయినా వేపకాయంత వెఱ్ఱిలేకపోలేదు.
* ఎంత మంచి పంది అయినా అమేధ్యం (అశుద్ధం) తినక మానదు.
* ఎంతయ్యా ఇవ్వాళ బేరంలో లాభంమంటే, ఎఱిగినవాడు వెఱ్ఱివాడు రాలేదన్నాడుట.
* ఎంతలావు మొగుడైనా ఆడదానికి లోకువే.
* ఎంతవారలైనా కాంత దాసులే.
* ఎంత వెలుగుకు అంత చీకటి.
* ఎంత సంపదో అంత ఆపద.
* ఎంత స్వామి ప్రసాదమైతే మాత్రం, ఇంత చేదా?
* ఎందరో మహానుభావులు (వ్యంగ్యంగా కూడ ప్రయోగం).
* ఎందరో మహానుభావులు, వారందరికి వందన మన్నారు.
* ఎందుకు ఏడుస్తావురా పిల్లవాడా? అంటే, ఎల్లుండి మా అమ్మ కొడుతుంది అన్నాడుట.
* ఎందుకు పుట్టావు ఏకా అంటే, ఎదుటివాళ్ళని వెక్కిరించటానికే అన్నదిట.
* ఎందుకు పుట్టావు వక్రమా అంటే సక్రమమైన వాళ్ళను వెక్కిరించను అన్నదిట.
* ఎందునైనా ముఖరాసి (జన్మరాశి) బాగుండాలన్నారు.
* ఎందుకొచ్చినావే ఎల్లమ్మా అంటే, అందుకు కాదులే అగ్గికొచ్చాను అన్నదిట.
* ఎందులో పుట్టిన పురుగు అందులోనే చస్తుంది (బ్రతుకుతుంది).
* ఎందులో పెట్టినా ఎడారే.
* ఎక్కగా ఎక్కగా పొడవు.
* ఎక్కడ ఉన్నావే కంబళీ అంటే, వేసిన చోటనే గొంగళీ అన్నదిట.
* ఎక్కడ కడితేనేమి, మన మందలో ఈనితే చాలు.
* ఎక్కడకొట్టినా కుక్క కాలు కుంటుతుంది.
* ఎక్కడైనా బావ అనుకానీ వంగతోటలో (కాడ) బావా అనకు.
* ఎక్కడమేసినా పేడ మన పెరట్లో వేస్తే చాలు.
* ఎక్కడ నుంచి వస్తున్నావోయ్ నత్తాయనా అంటే, రె రెడ్డొరించిను నుంచోయ్ చోయ్ న నంగాయనా అన్నాడట.
* ఎక్కడమేసినా మనింట్లో పాలిస్తే చాలు.
* ఎక్కడా దొరక్కపోతే అక్కమొగుడే గతి.
* ఎక్కడాలేకపోతే అక్క మొగుడే దిక్కు.
* ఎక్కడీకిపోతావు విధవమ్మా అంటే, వెంటవస్తాను పదవమ్మా అన్నదిట.
* ఎక్కడికిపోయినా ఏలినాటి శని తప్పదు.
* ఎక్కడీకిపోయినా కర్మం ఎదురుగుండానే వస్తుంది.
* ఎక్కడిదక్కడె ఉంచి ఎల్లమ్మ ఇల్లలికి నట్లు.
* ఎక్కడిదిరా ఈ పెత్తనం? అంటే, మూలనుంటే నెత్తిన వేసుకున్నా అన్నాడట.
* ఎక్కడి నీరూ పల్లానికే చేరుతుంది (పారుతుంది).
* ఎక్కమంటే ఎద్దుకు కోపం, దిగమంటే కుంటికి కోపం.
* ఎక్కితే గిఱ్ఱపు రౌతు, దిగితే కాలిబంటు.
* ఎక్కి కాయపట్టిచూసి, దిగివచ్చి రాళ్ళు రువ్వినట్లు.
* ఎక్కిరించబోయి వెలకిత్తలా (వెల్లికింతలా) పడ్డట్లు.
* ఎక్కువగా తిన్న పొట్ట, ఏకులు పెట్టిన బుట్టి చిరుగవు.
* ఎక్కువ తెలివి ఏడ్పుల కారణం, తక్కువ తెలివి తన్నుల కారణం.
* ఎక్కువయిన సొమ్ము బ్రహ్మలకిత్తునా? బట్లకిత్తునా?
* ఎగతాళి అంటే ఏడువ వస్తాడు, కోడిగ మంటే కొట్టవస్తాడు.
* ఎగతాళి చేసేవారిముందు జారిపడినట్లు.
* ఎగదీస్తే బ్రహ్మహత్య, దిగదీస్తే గోహత్య.
* ఎగవేసే వాడి ఇల్లెక్కడా? అంటే ఊరికడపట అన్నట్లు.
* ఎగిరిన దూది గాలిలో ఎంతోసేపు ఉండదు.
* ఎగిరెగిరి దంచినా అంతేకూలి, ఎగరక దంచినా అంతేకూలి.
* ఎగిరే ఎద్దే గంత మోసేది.
* ఎగరబోయి బోర్లపడి, ఊరు అచ్చివచ్చిందికాదు అన్నాడట.
* ఎగ్గును అనక, వినక, కనక కవి కావ్యం వ్రాయలేడు.
* ఎచ్చులకు (డంబములకు) ఏటపోతును కోస్తే, ఒళ్ళంతా బొచ్చు అయ్యింది.
* ఎచ్చులకు ఏలేశ్వరంపోతే పక్కతోలు కుక్కలెత్తుకు పోయినవి.
* ఎచ్చులకు వేటపాలెంపోతే, తన్ని తలగుడ్ద తీసుకున్నారట..
* ఎచ్చులకు ఏమారం పోతే, తన్ని తలగుడ్ద పెరుక్కున్నారుట.
* ఎట్లా (ఎట్లాంటి)చిరుబోణికైనా వేపకాయంత వెఱ్ఱి ఉంటుంది.
* ఎట్లా వచ్చిందో అట్లే పోతుంది, తేలికగా వచ్చింది తేలికగానే పోతుంది.
* ఏడదిడ్డమంటే, పెడదిడ్డ మన్నట్లు.
* ఎడపిల్ల ఏరాలితో సమానం.
* ఎడమచేత్తో చేసింది కుడిచేత్తో అనుభవించవలె.
* ఎడ్డెమంటే, తెడ్డెమన్నట్లు.
* ఎతలున్నమ్మకు కతలు రావు.
* ఎత్తివచ్చిన కాపురానికి ఏకాలూనినా ఒకటే.
* ఎత్తుకున్న చంకనుండదు, దించిన దిగువనుండదు. (బిడ్డ)
* ఎత్తుక తిన్నవాణ్ణి పొత్తులో పెట్టుకుంటే, అంతాతీసి బొంతలోపెట్టుకున్నాడుట.
* ఎత్తుకున్న బిడ్డ మొత్తుకున్నా దిగదు.
* ఎత్తుకొని తిన్న బోలె ఎదురుగా వస్తే, చంకనున్న బోలె సలాంచేసిందిట.
* ఎత్తుబడిన గొడ్డు పులికి జడుస్తుందా?
* ఎత్తుభారపు పెళ్ళికి ఏకాలుపెట్టినా ఒకతే. (ఎత్తుభారం=వ్యర్ధమైన, పనికి మాలిన).
* ఎత్తుభారం మొత్తుకోళ్ళు.
* ఎత్తుమరిగిన బిడ్డ, వెలుగుదాటే గొడ్డు ఏమిచేసినా వినవు.
* ఎత్తువారి బిడ్డ. (ఎవరిచంకనున్న వారిమాట వినును).
* ఎత్తెత్తి అడుగు వేస్తే పుల్లాకు మీద పడిందిట.
* ఎత్తెత్తిపోసినా ఇత్తడి బంగారమగునే?
* ఎత్తేవాడుంటే ఏకులబుట్టా బరువే.
* ఎదలో కత్తెర నాలుకలో బెల్లం.
* ఎదిగినదానిని వెంటేసుకు తిరిగినట్లు.
* ఎదుట అన్నది మాటా, ఎదాన్న పెట్టినది వాత.
* ఎదుట ఉన్నవాడు పెండ్లికొడుకు.
* ఎదుట బ్రాహ్మడు లేకపోతే వెయ్యి యఙ్ఞాలు చెయ్యవచ్చు.
* ఎదుట లేకుంటే ఎదలో ఉండదు.
* ఎదురింటి పొయ్యిమండితే, తన పొయ్యిలో నీళ్ళుపోసుకొన్నట్లు.
* ఎదుటివారి సొమ్ము ఎల్లవారికీ తీపు.
* ఎదురుగుండా అద్దముంటే ఎక్కిరించుకో బుద్దవుతుంది.
* ఎదురు తిరిగిన కుక్కను ఏదీ కరువలేదు.
* ఎదురు తిరిగిన కుక్కా ఏదుపంది ఒకటే.
* ఎదురుపడినవాడే నా మొగుడన్నట్లు.
* ఎదురుపెట్టి కుదురు కొట్టించుకొన్నట్లు.
* ఎదురుపెట్టి చదరంగ మాడినట్లు.
* ఎద్దు అంత కుప్పయితే ఏడు పుట్ల చోళ్ళు (సజ్జలు, రాగులు).
* ఎద్దు అడుగులో ఏడు గింజలుపడితే పైరు పలుచన.
* ఎద్దు (దున్న) ఈనిందంటే గాటా కట్టేయమన్నట్లు.
* ఎద్దు ఉన్నవాడికి బుద్ది ఉండదు, బుద్ది ఉన్నవాడికి ఎద్దు ఉండదు.
* ఎద్దు ఎండకులాగా, దున్నపోదు నీడకు లాగా.
* ఎద్దునెక్కున తీరుకాదు, సద్ది తిన్న నోరు కాదు.
* ఎద్దునెక్కున వాడే లింగడు, గద్దెనెక్కిన వాడే రంగడు.
* ఎద్దు ఏమెరుగురా అటుకుల రుచి, గాడిదేమెరుగురా గంధపు పొడి వాసన.
* ఎద్దుకాలిలో ముల్లంత లేకపోయినా, ఏడూళ్ళ పెత్తనానికి తక్కువ లేదు.
* ఎద్దుకు ఎనుబోతుకు లంకె వేసినట్లు.
* ఎద్దుకు కొబ్బరికాయ ఇస్తే ఏమి చేస్తుంది?
* ఎద్దుకు చొప్పవేసి ఆవుని పాలివ్వ మన్నట్లు.
* ఎద్దుకు తూలాలని ఉంది, గంతకు పడాలనీ ఉంది.
* ఎద్దుకెగవేయ, బఱ్ఱెకు సగవేయ.
* ఎద్దుకేమి తెలుసు అటుకుల చవి (రుచి).
* ఎద్దుకొద్ది సేద్యం, సద్ది కొద్దీ పయనం.
* ఎద్దు కొవ్వి ఆబోతుపై రంకె వేసినట్లు.
* ఎద్దుగా ఏడది బ్రతికేకంటే ఆబోతుగా (ఇరు) ఆరునెలలే చాలు.
* ఎద్దు చచ్చినా వాత బాగా పడింది.
* ఎద్దు చేనుమేసిపోతే గాడిదకు చెవులుకోసినట్లు.
* ఎద్దు తన్నుతుందని గాడిద కాళ్ళు పట్టుకొన్నట్లు.
* ఎద్దు తన్నుతుందని గుఱ్ఱంచాటు చేరినట్లు.
* ఎద్దుతో వ్యవసాయం, ఆలితో సంసారం.
* ఎద్దుని అడిగా గంత కట్టేది?
* ఎద్దును కొద్దిలో కొనరాదు, బట్టను భారీలో కొనరాదు.
* ఎద్దును చూస్తే ముద్దొస్తుంది, ఈడ్పుచూస్తే ఏడ్పు వస్తుంది.
* ఎద్దును ముద్దుపెట్టబోతే, ఎడమకాలితో తన్నింది.
* ఎద్దునోటికి చొప్ప అందించినట్లు.
* ఎద్దున్న వాడి వ్యవసాయం చూడు, మంది ఉన్నవాడి మారుబలం చూడు.
* ఎద్దు పుండు కాకికి ముద్దా?
* ఎద్దుపుండు కాకికి రుచి.
* ఎద్దు పొడుస్తుందని తన్నే గుర్రం చాటున చేరినట్లు.
* ఎద్దు బీదదయితే చేను బీద
* ఎద్దు మంచిదైతే వేరూరికి పోతుందా?
* ఎద్దు మోసినంత, గోనె పట్తినంత.
* ఎద్దురొమ్ములో ముల్లుకఱ్ఱ పొడిచినట్లు.
* ఎద్దులవెంటనే తాళ్ళు.
* ఎద్దులా కష్టపడినా ఎంగిలి గంజే గతి.
* ఎద్దులు కాసినందుకు, ముద్దలు మింగినందుకు సరిపోయిందిపో అన్నాడట.
* ఎద్దులు చేయును, గుఱ్ఱాలు మొయ్యను (మేయును).
* ఎద్దులెప్పటివేగానీ గోనెలుమాత్రం కొత్తవి.
* ఎద్దువలే ఉన్నావే తేలుమంత్రం తెలియదా?
* ఎద్దువలే కుక్కనుపెంచి రెడ్డి తానే (ఆలుమొగలు తామే) మొరిగినాడ(ర)ట.
* ఎద్దువలే తిని మొద్దువలే నిద్రపోయినట్లు.
* ఎద్దయినా ఏడాదికి నేర్చును, మొద్దు ముప్పై ఏళ్ళయినా నేర్వడు.
* ఎనుబోతు పేదల యశముగోరు.
* ఎనుబోతు బలిసి ఏనుగవలెనున్న భ్రమరములకు మదప్రాప్తి లేదు.
* ఎనుబోతుమీద వానకురిసినట్లు.
* ఎనుము గొప్పదయినా ఏనుగును బోలునా?
* ఎనుము ముసలి, ఏనాది ముసలి లేవు.
* ఎనుముకు మేతవేసి ఆవుని పితికినట్లు.
* ఎన్నడూ గానని మొగానికి ఇప్పపూత బెల్లమంట.
* ఎన్నడులేని కల్మి కల్గెనా వెన్నున కద్దమడుగు, కొనవేళ్ళకు ముచ్చెలు తొడుగు.
* ఎన్నడూ ఎక్కని రెడ్డి గుఱ్ఱమెక్కితే వెనుక ముందయిందట.
* ఎన్నడూ ఎఱుగని వానిని ఎద్దుల బేరానికి పంపితే ఎఱ్ఱెద్దుకు ఎనభై, నల్లెద్దుకు నలభై అన్నడట.
* ఎన్నడు దొరకనమ్మకు ఏగాణి దొరికితే, ఏడు ముళ్ళు వేసిందట.
* ఎన్నడూ నా మొగుడు 'ఎల్లి, ఎల్లి,' అనలేదుగానీ ఇల్లు కాలిననాడు ఎల్లి ఎల్లి అన్నాడు.
* ఎన్ని పూటులేసినా ఇత్తడి ఇత్తడే, పుత్తడి పుత్తడే.
* ఎన్నిబూతులైనా పిడికెడు కొఱ్ఱలతో సరికావు.
* ఎన్ని ముట్టుపాతలైతే ఒక కట్టుకోక అవుతుంది?
* ఎన్ని విద్యలైనా కులవిద్యకు సాటిరావు.
* ఎన్ని సూదులైతే ఒక గడ్డపారగానూ?
* ఎన్నో వ్రణాలు కొసానుగానీ నా వ్రణమంత తీపులేదు అన్నాడుట.
* ఎప్పుడూ ఎరగనోడు ఏతాము తొక్కితే ఏటా ఆరుబారల అప్పు.
* ఎప్పుడూ పెట్టే నాలుగూపెట్టి (చీవాట్లు)కొఱ్ఱలచేట బయటపెట్టు అన్నాడుట.
* ఎప్పుడూ యోచిస్తుండేవాడు అభాగ్యుడు, ఎన్నడూ యోచించనివాడు అవివేకి.
* ఎప్పటి అమ్మకు నిప్పటే గతి. (నిప్పటి=అరిసె).
* ఎముక కొరికే కుక్క ఇనుము కొరుకునా?
* ఎముకలేని నాలుక ఎత్లాతిప్పినా తిరుగుతుంది.
* ఎరవుల కంచమని ఎదో పెట్టుకు తిన్నట్లు.
* ఎరువుల సొమ్ములు బరువుచేటు, తియ్యను పెట్టను తీపులచేటు, దానిలో ఒకటిపోతే అప్పుల చేటు.
* ఎరువు ఉంటే, వెఱ్ఱివాడూ సేద్యగాడే.
* ఎరువును నమ్మి బొంతను పొయ్యిలో పెట్టుకున్నట్లు.
* ఎరువుపెట్టిన పొలము, ఏలుబడి అయిన కోడలు.
* ఎరువులేని పైరు, పరువులేని రైతు.
* ఎరువులేని పొలము, వేగంలేని ఏరు.
* ఎరువులేని సేద్యం కరువుదేవతకు వాద్యం.
* ఎరువు వేయగానే (ఊసర) క్షేత్రం ఫలించునా?
* ఎరువు స్థిరం కాదు బరువు తేలిక కాదు.
* ఎరువూ వెంపలిస్తే ఎదిగిందే పైరు.
* ఎఱిగి ఎఱిగి చేసిన పాపం, ఏడ్చి ఏడ్చి పోగొట్టుకోవలె.
* ఎఱుక తేలిన (ఏలిన) ఏడుఘడియలకు వాన.
* ఎఱ్ఱకోమటిని, నల్ల బ్రాహ్మణుడిని నమ్మరాదు.
* ఎఱ్ఱమాదిగను, నల్ల బాపని నమ్మరాదు.
* ఎఱ్ఱని ఆకాశానికి బఱ్ఱున వానలు.
* ఎఱ్ఱనేలవంట ఒకనాటి వంట.
* ఎలమఱ్ఱుకు ఎద్దునివ్వరాదు, పామఱ్ఱుకు పడుచునివ్వరాదు.
* ఎలుక ఎప్పుడూ తన దిక్కుకే తవ్వుకుంటుంది.
* ఎలుక ఎంత ఏడ్చినా పిల్లి కనికరిస్తుందా?
* ఎలుక ఏట్లోపోతేనేమి? పులి బోనున పడితేనేమి.
* ఎలుకకు పిల్లి సాక్షి (సాక్ష్యం).
* ఎలుక చావుకు పిల్లి మూర్చ పోతుందా?
* ఎలుక తోలు ఎంత తోమినా నలుపే.
* ఎలుక నోట్లో నుంచి ఏనుగు దంతాలు రావు.
* ఎలుకమీద కోపంతో ఇంటికి చిచ్చుపెట్టుకొన్నట్లు.
* ఎలుక సంసారం చూసి పిల్లి మూర్చపోయిందిట.
* ఎల్లపాములు తలెత్తితే, ఎలికపామూ తలెత్తిందిట.
* ఎల్లమ్మ పెళ్ళిలో పులమ్మ శోభనం.
* ఎల్లమ్మ బ్రతుకు తెల్లవారితే తెలుస్తుంది.
* ఎల్లయ్యకు ఎడ్లులేవు, మల్లయ్యకు మనుష్యులు లేరు.
* ఎల్లయ్యకెడ్లు లేవు, మల్లయ్యకు బండిలేదు, తెల్లవార్లు బాడుగే.
* ఎల్లవారమ్మల బ్రతుకు తెల్లారితే తెలుస్తుంది.
* ఎల్లినదానికి ఏగాని తార్చినదానికి టంకం.
* ఎల్లిని మల్లి చేయి, మల్లిని ఎల్లి చేయు.
* ఎల్లి మీద పుల్లి, పుల్లి మిద ఎల్లి
* ఎల్లిసెట్టి లెక్క ఏకలెక్క.
* ఎవడబ్బ సొమ్మని వెక్కి వెక్కి ఏడవటం.
* ఎవడికంపు వాడికి ఇంపు.
* ఎవడి జందెం వాడికి ముప్పు.
* ఎవడి నోటికంపు వాడికి తెలియదు.
* ఎవడు తవ్వుకొన్న గోతిలో వాడే పడతాడు.
* ఎవరి ఇంటి దోసెకైనా తూట్లే.
* ఎవరి ఏడుపు వాళ్ళకే ఎదురు తగులుతుంది.
* ఎవరి కంతికోస్తే వారికే నొప్పి.
* ఎవరి పిచ్చి వారికి ఆనందం.
* ఎవరికి పుట్టిన బిడ్దవురా ఎక్కి ఎక్కి ఏడ్చేవు?
* ఎవరికి పెట్టావే దండము? అంటే మీలో బుద్దిహీనుడికి అన్నదిట సాని.
* ఎవరికి వారే యమునా తీరే.
* ఎవరికో పుట్టిన బిడ్డను తన బిడ్డని ఎగిరెగిరి ముద్దుపెట్టుకున్నట్లు.
* ఎవరి జానతో వారు ఏడు జానల బెత్తెడే (పొడవు).
* ఎవరి నీళ్ళలో వారు మునగాలి.
* ఎవరి పాపాన వాళ్ళు పోతారు.
* ఎవరిపిచ్చి వాళ్లకు ఆనందం
* ఎవరి ప్రాణం వాళ్ళకు తీపి.
* ఎవరి బిడ్డ వారికి ముద్దు.
* ఎవరి ముడ్డికిందికి నీళ్ళు వస్తే వాళ్ళే చేస్తారు.
* ఎవరివల్ల చెడ్డవోయి వీరన్నా అంటే నోటివల్ల చెడ్డానోయి పేరన్నా అన్నాడుట.
* ఎవరు ఇచ్చింది ఈ మాన్యం అంటే, నేనే ఇచ్చుకున్నాను అన్నాడట.
* ఎవరు ఎంతచేసినా ఇంటికి ఆలు అవుతుందా? దొంతికి కడవ అవుతుందా?
* ఎసటిలో మెతుకులన్ని పట్టిచూడాలా?
**********:: ఏ ::**********
* ఏ అన్నమైతే ఏం? వరి అన్నమే వడ్డించమన్నాడుట.
* ఏ ఆకు రాలినా ఈతాకు రాలదు.
* ఏవూరు ఏతామా? అంటే దూవూరే దూలామా అన్నదిట.
* ఏవూరు రెడ్డీ అంటే ఏట్లో మోకాలిలోతు అన్నాడట.
* ఏ ఎండకా గొడుగు పట్టినట్లు.
* ఏకచక్రంగా ఏలిన రాజైనా కడకు ఏడు జానల కాటికే.
* ఏకదంతుండిచ్చు నీకింత బొచ్చు.
* ఏ కఱ్ఱన నిప్పుంటే ఆ కఱ్ఱే కాలుతుంది.
* ఏకాదశి ఇంటికి శివరాత్రి పోయినట్లు.
* ఏకాదశినాడు తల అంటుకుంటున్నావేమీటీ అంటే అది నిత్యవ్రతం, నేడే ఆరంభించాను అన్నాడట; మర్నాడు తల ఎందుకు అంతుకోలేదంటే, నిన్నటితో వ్రతం సమాప్తి అయినది అన్నాడుట.
* ఏకాదశినాడు పేలపిండి తినకపోతే రాక్షసులై పుడతారు.
* ఏకాదశి మరణమని ఈతకొయ్యలలో పడతానా?
* ఏకాల వచ్చి, మేకాల తేలినట్లు.
* ఏకాలు జారినా పిఱ్ఱకే మోసం.
* ఏకాలు జారినా మోపుకే మోసం.
* ఏకుతో తాకితే మోకుతో మోదుతారు.
* ఏకు దారము, ఏగాని పుస్తె.
* ఏకులు పెడితే బుట్టలు చిరుగునా?
* ఏకులు లేని రాటము, మొగుడులేని పోరాటము.
* ఏకులు వడికినట్టూ కాదు, మొగుడి దగ్గర తొంగునట్టూ కాదు.
* ఏకైకరధులు ప్రత్యేక పాలెగాండ్రు.
* ఏగాని ముండకు డబ్బున్నర క్షౌరం.
* ఏగాలి కాఊపు ఊగినట్లు.
* ఏగాలి కాచాప ఎత్తినట్లు (పడవ తెరచాప).
* ఏగిలి (దుక్కి బాగా ఎండుట) చేస్తే ఏలనివానికైనా పండుతుంది.
* ఏగిలి దున్నితే, వెఱ్ఱిమాలకైనా పండుతుంది.
* ఏ గుంటలో నీరు ఆ గుంటలోనే ఇంకుతుంది.
* ఏ గుఱ్ఱానికి తోక ఉంటే, ఆ గుఱ్ఱమే ఊపుకుంటుంది.
* ఏ గూటి చిలుకకు ఆ గూటి పలుకు.
* ఏ గూటి పక్షి ఆ గూటికే చేరును.
* ఏ గ్రహము పట్టినా ఆగ్రహము పట్తరాదు.
* ఏ చంకనాకినా ఏమీ లేదుగానీ, ఏకు చంకనాకితే ఏగాని ఉంది.
* ఏ చెట్టులేని చోట వెంపలి చెట్టు (ఆముదపు చెట్టు) మహావృక్షం.
* ఏటికవతల ఇచ్చేకన్నా ఏట్లో పడేస్తే నయం.
* ఏటి అవుతలు మిరియాలు మా తాటికాయంతేసి అంటే, మా ఇడుమాకులే పట్టలేదన్నదిట. (ఇడుమాకులు= ఇంటి ముందరి ప్రాంగణము).
* ఏటి ఈతకు బీటి మేతకు సరి.
* ఏటి ఒడ్డు చేను ఏరు వస్తే నిలుస్తుందా?
* ఏటి కాడ నక్కకు పాటి రేవేమి తెలుసు.
* ఏటికి ఎప్పుడు పోయినావు? ఇసుక తెచ్చావు? అంటే ఆడవారు తలిస్తే అదెంత సేపు అన్నదిట; మొగవారు తలిస్తే ఇదెంతసేపు అని నాలుగు బాదినాడుట.
* ఏటి కాల్వ జూడ ఎక్కి తగ్గిన రీతి.
* ఏటికి ఎదురీదినట్లు.
* ఏటికి ఎన్ని నీళ్ళూ వచ్చినా, కుక్కకు గతుకు నీళ్ళే.
* ఏటికి పోయి జారిపడి ఊరు అచ్చిరాలేదన్నాడుట.
* ఏటికి లాగితే కోటికి, కోటికి లాగితే ఏటికి అన్నట్లు.
* ఏటి కట్టున కూటి గట్టున ఓపిక పట్టలేరు.
* ఏటిదరి మ్రానుకు ఎప్పుడూ గండమే.
* ఏటిమీద దేవరకు కూటిమీదే చింత.
* ఏటివంక లెవరు తీస్తారు, కుక్కతోక ఎవరు సరిచేస్తారు?
* ఏటి వరద, నోటి దురద.
* ఏటుకు ఏటు, మాటకు మాట.
* ఏట్లో కలిసిన చింతపండు లాగా.
* ఏట్లో పడ్డవానికి ఎన్నో ఎన్నికలు.
* ఏట్లో పారేనీరు ఎవరు తాగితేనేమీ?
* ఏట్లో వేసినా ఎంచి వేయవలెను.
* ఏడవ గలిగితే ఏడ్చినకొద్ది వ్యవసాయం.
* ఏడాటం (ఇబ్బంది) మొగుడికి ఎత్తుభారం పెళ్ళాం.
* ఏడు ఎందల విన్ననాలు ఎంతవరకైనా ఆగుతాయి.
* ఏడు కరువులు వస్తున్నాయిరా అంటే, తొలి కరువులోనే పోతే మిగతా ఆరు ఎంచేస్తాయి అన్నాడుట.
* ఏడుకాంపులమ్మకు మూడు కాంపులమ్మ ముక్క నేర్పినట్లు.
* ఏడుగురిని మారిస్తే పెద్ద గౌడసాని.
* ఏడునెలలకు ఎందుకు నడకాలు అన్నట్లు.
* ఏడుపు ఏడింటి కనర్ధం.
* ఏడుపులో ఏడుపు ఎడమచేయి చూపెట్టు అన్నట్లు.
* ఏడుమనువులు పెళ్ళైనా ఏకులరాట్నం తప్పలేదు.
* ఏడుమాటలు మాట్లాడినా, ఏడు అడుగులు నడిచినా గుణం తెలుస్తుంది.
* ఏడు మారినా, ఈడు ముదిరినా ఏమీమారదు ఈ లోకంలో.
* ఏడుమాసికాల చీర, ఎదురు బాసింగాల రవిక, జరుగుతూ జరుగుతూ నేను సారె కట్టుక వచ్చినాను.
* ఏడుమెతుకులు తింటే ఏనుగంత సత్తువ.
* ఏడుసార్లు పాసిన చేల్లో పండిన కంకితో ఏడుగుర్ని చంపవచ్చు.
* ఏడుస్తావు ఏమి ఎలుకా? అంటే నా బాధ నీకే మెఱుక అన్నదిట.
* ఏడుస్తున్న వాణ్ణి దాని(న)మ్మకాయలు కావాలా అంటే, దానికాయలే కావాలి అన్నాడుట.
* ఏడుస్తూన్నావెందుకు బ్రాహ్మడా? అంటే ఒకనాడు నామొగం నవ్వి చచ్చిందా అన్నాడట.
* ఏడుస్తూ ఏరువాక సాగిస్తే, కాడిమోకు దొంగలు దోచుకుపోయారుట.
* ఏడూళ్ళు తిరిగినా, ఎఱ్ఱకఱ్ఱిదాన్ని కొనమన్నారు.
* ఏడ్చి ఎంకటసామీ అనిపించుకొన్నట్లు.
* ఏడ్చి మొహం కడుకున్నట్లు.
* ఏడ్చేదాని ఎడమచేతి కిందా కుట్టెవాని కుడిచేతికిందా కూర్చోరాదు.
* ఏడ్చేదాని బిడ్డకు అరటిపండ్లు చూపినట్లు.
* ఏడ్చేదాని బిడ్డను ఆమే కనవలెను అన్నట్లు.
* ఏడ్చేదాని మొగుడు వస్తే, ఏకు వడికే దాని మొగుడూ వస్తాడు.
* ఏడ్చేదాని మొగుడు వస్తే, నా మొగుడూ వస్తాడు.
* ఏతానులో పీలిక ఆ తానుకు చెందినట్లు.
* ఏతాము ఎంతవంగినా తిరిగి లేచేదానికే కదా.
* ఏతాము పాటకు ఎదురులేదు.
* ఏదారి అంటే గోదారి అన్నట్లు.
* ఏది పట్టినా దెయ్యం పట్టినట్లు.
* ఏదీకాని వేళ గేదె ఈనినట్లు.
* ఏ దేముడు వరమిచ్చినా పెనిమిటిలేనిదే పిల్లలు పుట్టరు.
* ఏనుగంత తండ్రి ఉండేకంటే, ఏకంత తల్లి ఉండేది మేలు.
* ఏనుగ ఎక్కినవాడు, దొడ్డికంత దూరగలడా?
* ఏనుగు ఎత్తిపడితే (చతికిలపడితే) ఏనుగే లేవాలికానీ ఎవరు లేవతీయగలరు?
* ఏనుగు ఎత్తుబడినా గుఱ్ఱమంత ఎత్తు.
* ఏనుగు ఒళ్ళు ఏనుగకు బరువు, చీమ ఒళ్ళు చీమకు బరువు.
* ఏనుగకు ఎలక్కాయలు లొటలొట.
* ఏనుగకు ఒక సీమ, గుఱ్ఱానికొక ఊరు, బఱ్ఱెకొక బానిస.
* ఏనుగకు కాలువిరగటం, దోమకు రెక్కవిరగటం సమము.
* ఏనుగకు సీళ్ళు చూపినట్లు (సిడి=అంకుశం).
* ఏనుగ తన నెత్తిన తానే మన్ను పోసుకున్నట్లు.
* ఏనుగ తొండము, యావ బట్టిన ముండ ఊరుకోవు.
* ఏనుగు దాహానికి చూరునీళ్ళా?
* ఏనుగుది ఎందరు కుడిస్తే తరుగుతుంది?
* ఏనుగునైనా ఎంటితో కట్తవచ్చు (ఎంటి=గడ్డిపరకలతో నేసిన త్రాడు).
* ఏనుగును ఇచ్చి అంకుశం దాచినట్లు.
* ఏనుగును ఎక్కినవాడు, కుక్క కూతకు జడియడు.
* ఏనుగును చూసి కుక్కలు మొరిగినట్లు.
* ఏనుగును తెచ్చి ఏకులబుట్టలోపెట్టి అది తన నెత్తిన పెట్టి, తనను ఎత్తుకోమన్నట్లు.
* ఏనుగునేక్కి రంకుకు పోయినట్లు.
* ఏనుగు పురుడోసుకొన్నట్లు.
* ఏనుగు పోతూనే ఉంటుంది, కుక్కలు మొరుగుతూనే ఉంటవి.
* ఏనుగు పోయేదారి ఎరుగడుగానీ, దోమలు పోయేదారిలో తొంగున్నాడు.
* ఏనుగు బ్రతికినా వెయ్యి, చచ్చినా వెయ్యి.
* ఏనుగు మదిస్తే నెత్తిన మన్ను పోసుకుంటుంది.
* ఏనుగు మింగిన వెలగపండువలె (కరిమింగిన వెలగపండు).
* ఏనుగు మీద ఎండ కాసినట్లు.
* ఏనుగుమీద దోమ (ఈగ) వాలినట్లు.
* ఏనుగుమీద పొయేవాణ్ణి సున్నమడిగినట్లు.
* ఏనుగు మోత, ఏనుగు మేత.
* ఏనుగు రొంపిలో కూరుకుపోతే కాకికి కూడా లోకువే.
* ఏనుగులను అప్పుగా ఇస్తున్నారంటే, రెండు తోలుకొని వచ్చి కట్టివేయమన్నాడట.
* ఏనుగులెగిరిపోతుంటే దోమలొక లెక్కా?
* ఏనుగులు ఏట కొట్టుకొనిపోతుంటే, పిల్లి పాటి రేవడిగిందట.
* ఏనుగులు ఏట గ్రుంకితే నక్క పాటిరేవడగ వచ్చిందట.
* ఏనుగులు మింగిన ఎల్లమ్మకు పీనుగలు పిప్పళ్ళు.
* ఏపట్లా చావకపోతే బాపట్లకు పంపండి.
* ఏపాటు తప్పినా సాపాటు తప్పదు.
* ఏపుట్టలో ఏ పామో? ఏ గుళ్ళో ఏ మహత్యమో.
* ఏ పూజ తప్పినా పొట్ట[పూజ తప్పదు.
* ఏబ్రాసికి పని ఎక్కువ, లోభికి ఖర్చెక్కువ.
* ఏబ్రాసి పెళ్ళికెడుతూ ఉంటే ఏకులరాట్నం ఎదురయిందట.
* ఏమండీ కరణం గారు గోతిలో పడ్డారే? అంటే, కాదు మషాకత్తు చేస్తున్నా అన్నాడట.
* ఏమందలో కట్టినా మన మందలో ఈనితే సరి.
* ఏమయ్యా మా వారు బాగున్నారా? అంటే, అమ్మా బాగానే ఉన్నారు; విత్తనాలు వడ్లు తింటున్నారు, దాపుడు బట్టలు కడుతున్నారు ఆన్నడట.
* ఏమి అప్పాజీ అంటే కాలం కొద్ది రాయాజీ అన్నట్లు.
* ఏమిచేసి బ్రతుకుతున్నావమ్మా? అంటే నోరుచేసుకు బ్రతుకుతున్నా బిడ్డా అన్నదిట.
* ఏంచేస్తున్నావురా? అంటే ఒలకపోసి ఎత్తుకుంటున్నా అన్నట్లు.
* ఏమిట్రా మేనమామ ముడ్డిలో కట్టె పెడతావు? అంటే, చిన్నాయన అనుకున్నాను అన్నడట.
* ఏమిపెట్టుక తిన్నావు? అంటే, ఆకలెట్టుక తిన్నానందిట.
* ఏమిరా వెఱ్ఱిమొగమా? అంటే, ఏమి చిన్నాయనా అన్నాడట.
* ఏమి పోలిసెట్టి? అంటే, ఎప్పటి మొత్తుకోళ్ళే అన్నడట.
* ఏమిరా కోటా? అంటే, ఎప్పటిదే ఆట అన్నడట.
* ఏమీ ఎరుగనోడు ఏకాశిన చస్తే అన్నీ తెలిసినోడు అమావాశ్యనాడు చచ్చాడట.
* ఏమీ ఎరుగని ఎల్లి పాయె, దొంతులేస్తే దొల్లిపోయె.
* ఏమీ ఎరుగని పిల్ల మామను మరిగిందట.
* ఏమీ తోచకపోతే ఎక్కిరించాడట.
* ఏమీ తోచనమ్మ తోడికోడలి పుట్టింటికి వెళ్ళిందట.
* ఏమీ లేదంటగానీ ఎల్లుండి పెండ్లంట.
* ఏమీ దొరకనమ్మకు ఏగాణి దొరికితే ఎందులో పెట్టనే ఎంకాయమ్మా అన్నదిట.
* ఏమీలేనమ్మకు ఏడ్పులు శృంగారం.
* ఏమీ లేనమ్మకు ఏతులు లావు, ఉన్నమ్మకు ఆశలు లావు (ఏతులు=ఎచ్చులు, డంబాలు).
* ఏమీ లేనిదానికి ఏతులు లావు, స్వాములవారికి జడలు లావు.
* ఏమే వాడి దగ్గర పడుకున్నావు? అంటే, అంత పెద్దమనిషి చెయ్యిపట్టుకుంటే కాదనే దెట్లా? అన్నదిట.
* ఏమోయి నీకూతురలా తిరుగుతున్నది? అంటే, అలవాటుపడిన ముండను అట్లానే పోనీస్తూ అన్నాడట.
* ఏమోయి సెట్టి ఏట్లో కొట్టుకుపోతున్నావు? అంటే గడ్డిమోపు అమ్మటానికి అన్నాడట.
* ఏమోయి నారాయణా, విధవగమనా అంటే, అది చిన్ననాటి మాట ఊరుకో అన్నాడట. (వి=పక్షి, ధవుడు=భర్త, విధవగమన=పక్షిపై పయనించేవాడు, నారాయణుడు).
* ఏ యీకలపక్షి ఆ గుంపులో చేరుతుంది.
* ఏ ఎండ కా గొడుగు పట్టినట్లు.
* ఏ రాజ్యానికి ఏ రాజో అన్నట్లు.
* ఏ రాయి ఐతేనేమి పండ్లు ఊడగొట్టుకోవటానికి.
* ఏరుక తినే వాడి వెంబడి గీరుక తినేవాడు పడ్డాడుట.
* ఏరుకుని తినే పక్షికి ముక్కున ముల్లు విరిగినట్లు.
* ఏరూరి వ్యవసాయం ఊండూరి వైద్యం.
* ఏరువస్తే వాన వెలుస్తుంది.
* ఏ రోటి దగ్గర ఆపాట పాడాలి.
* ఏరు ఏడామడ లుండగానే చీరవిప్పి చంకనేట్టు కుందిట.
* ఏరు నిండిపారినా పాత్రకు తగురీతి నీరువచ్చు.
* ఏరుదాటి తెప్ప తగుల బెట్టినట్లు.
* ఏరుదాటే వరకు ఎంకన్న, ఏరు దాటినాక సింగన్న.
* ఏరు పోయిందే పోక, ఏలిక చెప్పిందే తీర్పు.
* ఏలడానికి ఊళ్ళు లేకపోవుగానీ, ఎత్తుకతినడానికి (అడుక్కతినను)ఊళ్ళు లేవా?
* ఏలి మీద గోరు మొలిచింది ఏంజేతు మొగుడా అన్నదట.
* ఏలేటి పురుషునికి ఏడ్గురు భార్యలు.
* ఏలేవానికి ఎద్దుపోతేనేమి? కాచేవానికి కన్ను పోతేనేమి?
* ఏవాడ చిలుక ఆ వాడ పలుకు పలుకుతుంది.
* ఏ వన్నె సులోచనం పెట్టుకుంటే ఆవన్నే కనిపించేది.
* ఏ వేషం వచ్చినా దివిటివానికే చేటు. (వీధిభాగవతాలలో)
**********:: ఐ ::**********
* ఐదు శిఖలకంటే మూడు కొప్పులు చేరితేనే మోసం.
* ఐశ్వర్యదేవత హలంలోనే ఉంది.
* ఐశ్వర్యానికి అంతంలేదు, దారిద్ర్యానికి మొదలు లేదు.
No comments:
Post a Comment